भिम रावललाई संचारमन्त्रीले भने- बालुवाटारबाट ‘ज्यान मार्ने धम्की’ दिनेको नाम दिनुस कारबाही हुन्छ

काठमाडौं-सरकारका प्रवक्ता गोकुल बाँस्कोटाले बालुवाटारबाट ज्यान मार्ने धम्की दिनेको नाम बताउन नेकपाका नेता भीम रावललाई आग्रह गरेका छन् । बिहीबार पत्रकार सम्मेलन गरी संचार तथा सुचना प्रविधि मन्त्री समेत रहेका बाँस्कोटाले बालुवाटारबाट कसैले पनि ज्यान मार्ने धम्की नदिएको र यदि दिएको भए नाम भन्न आग्रह गरे।

उनले भने – ‘भीम रावलज्यूको ज्यान मार्ने धम्की बालुवाटारबाट आयो ? यो तपाईंलाई पत्यार लाग्छ ? कोही व्यक्ति प्रधानमन्त्रीलाई मनपर्न सक्छ, मन नपर्न पनि सक्छ, विरोध हुन सक्छ तर ज्यान मार्ने धम्की भन्ने कुरामा कुनै सत्यता छैन। यस्तो कुरा हुँदा पनि होइन’,बाँस्कोटाले कसले फोन गर्‍यो र कुन नम्बरबाट फोन आयो भनेर रावलले भन्न सक्नुपर्ने बताए।

फरक विचार राखेकै कारण कसैलाई पनि ज्यान मार्ने धम्की दिन नमिल्ने भन्दै उनले बालुवाटारबाट कसले र कुन फोन नम्बरबाट धम्की दियो भन्ने प्रष्ट पार्न नेता रावललाई आग्रह गरे।

प्रवक्ता बाँस्कोटाले प्रधानमन्त्री पनि नेकपाकै नेता र भीम रावलसमेत नेकपाकै नेता भएकाले त्यो सम्भव नहुने प्रष्ट पारे।

रावलले पछिल्लो समय आफूलाई बालुवाटारबाटै ज्यानमार्ने धम्की दिएको दाबी गर्दै आएका छन्। मन्त्रिपरिषद्का निर्णयहरु सार्वजनिक गर्न बिहीबार आयोजित नियमित पत्रकार सम्मेलनमा मन्त्री बास्कोटालाई यसबारे सोधिएको थियो।