न्याय पहुँचले पाउने कुरा होइन, कसैलाई काखा कसैलाई पाखा गर्न मिल्दैन-सांसद बस्नेत

हेटौंडा – भक्तपुर क्षेत्र नं. २ का प्रतिनिधिसभा सांसद महेश बस्नेतले जनताको आवाज सरकारले छुटाएछ भने संसद प्रक्रियाको माध्यमबाट प्रवेश गराउने बताएका छन् ।

नेपाल कम्युनिष्ट पार्टी नेकपाका केन्द्रीय सदस्य एवं पूर्वमन्त्री समेत रहेका बस्नेतले लोकतन्त्रको सबैभन्दा शक्तिशाली भनेकै जनता भएको बताए ।

केन्द्रको कानून न्याय तथा संसदीय मामिला मन्त्रालय र बागमती प्रदेशको आन्तरिक मामिला तथा कानून मन्त्रालयले गरेको कार्यक्रममा उनले कुनैपनि राजनीतिक पहुँच, शक्ति, स्रोत, साधनको आधारमा द्वन्द्व पिडितले पाउने न्याय नमर्ने बताए ।

उनले कानुनको नजरमा कसैलनाई काखा र कसैलाई पाखा नहुने समेत बताए ।

द्वन्द्वका समयमा मानव अधिकार विरोधी तथा अपराधलाई छानविन गरी पिडित र पिडकबीचको छलफल गरी मेलमिलाप, क्षमादानको वातावरण बनाउने तथा जगन्य अपराधीलाई कानुनी कारवाही हुने उनको भनाई छ ।

सत्य निरुपण तथा मेलमिलाप आयोगले अपेक्षित रुपमा काम गर्न नसकेको औंल्याउँदै बस्नेतले द्वन्द्व पिडित जनता तथा सरोकारवाला निकाय माझ पुगी समस्याको जानकारी लिई आवश्यकता अनुसार कानुन संशोधन गर्ने तयारीमा सरकार रहेको बताए ।

द्वन्द्वको समयमा सेना प्रहरीलाई पिडक पक्षको जस्तो व्यवहार गर्नु नहुने पिडितको जनगुनासोलाई समाधान गरी वैधानिक तवरले अघि बढ्नपर्नेमा उनको जोड छ ।

उनले पहुँच हुनेले राज्यद्वारा पाउने सेवा सुविधा पाएको तर नहुनेले नपाएको पिडितको गुनासोलाई सुनुवाई गर्नुपर्नेमा जोड दिए ।