जिल्ला सभापतिकाे भेलाबाट कांग्रेस संस्थापनइतर उत्साहित

काठमाडौं– नेपाली कांग्रेसका असन्तुष्ट पक्षका जिल्ला सभापतिहरुले पार्टी सभापति शेरबहादुर देउवा र वरिष्ठ नेता रामचन्द्र पौडेललाई ज्ञापन पत्र बुझाउने भएका छन् ।सोमबारबाट पार्टी कार्यालय सानेपामा बसेको असन्तुष्ट पक्षका जिल्ला सभापतिहरुको भेला आज सकिएको छ ।

नेपाली कांग्रेसमा वरिष्ठ नेता रामचन्द्र पौडेल, कृष्ण सिटौला पक्ष सभापतिको कार्यशैली, पुस ११ गतेको केन्द्रीय समिति बैठकको निर्णय लगायतमा असन्तुष्ट रहेको छ । सभापति देउवालाई दवाव दिनका लागि असन्तुष्ट पक्षले जिल्ला सभापतिहरुको भेलाको आयोजना गरेको थियो ।
‘तीन दिन सम्म ४६/४७ जिल्लाका सभापतिहरुबीच घनिभूत रुपमा छलफल भयो’ नुवाकोट कांग्रेसका सभापति जगदीश नरसिंह केसीले भने,‘सभापति र वरिष्ठ नेतालाई पार्टी कार्यालयमा बोलाएर ज्ञापनपत्र बुझाउँछौं ।’उनले भोलि विहान सभापति देउवाले चियापानका लागि बूढानिलकण्ठमा बोलाएपनि ज्ञापनपत्र भने पार्टी कार्यालयमा नै बुझाउने बताए ।

तीन दिन जिल्ला सभापतिहरुको भेलामा पार्टीमा देखिएका समस्या समाधानका लागि पहल गर्न शीर्ष नेतृत्वलाई आग्रह गर्ने, पार्टीमा गुटबन्दी अन्त्य गर्नुपर्ने लगायतका निर्णय गरेको केसीले जानकारी दिए ।

‘पुस ११ गतेको केन्द्रीय समिति निर्णयपछि पार्टीमा देखिएको विवाद पार्टी नेतृत्वले सकेसमम छिटोभन्दा छिटो समाधान गर्ने र विधान भित्र रहेका निलमिबत रहेका धाराहरुलाई फुकाउनु पहल गर्ने, विभागलाई २८ मै ल्याउनका लागि पहल गर्नुपर्छ’ उनले भने,‘ पार्टीमा गुटबन्दी र भागवण्डाको अन्त्य गर्ने वातावरण सभापतिले मिलाउनु पर्छ । पार्टीमा त्याग, तपत्यसा र बलिदानको मूल्यांकन सभापतिले गरेर अघि बढ्नुपर्छ भन्ने हाम्रो निष्कर्ष हो ।’

पुस ११ गते सभापति देउवा पक्षका केन्द्रीय सदस्यले बहुमतबाट विधानको सदस्यतासम्बन्धी धारा निलम्बन, १४ औं महाधिवेशनको कार्यतालिका जारी गर्नेलगायत निर्णय गरेको थियो । उक्त निर्णय सच्याउन उनीहरुले देउवालाई दवाव दिएका थिए ।

जिल्ला सभापतिहरुको भेला जारी रहँदै सभापति देउवाले भने असन्तुष्ट पक्षको माग सम्बोधन गर्न केही लचक हुने संकेत गरेका छन् ।
देउवा निकटका नेता एनपी साउदका अनुसार असन्तुष्ट पक्षलाई पनि सम्बोधन गर्ने गरी सभापति देउवा कार्यतालिका समायोजनमा तयार भएका हुन् ।

पार्टीमा देखिएको समस्या समाधानका लागि दोस्रो तहका नेताहरुले यसबीचमा सक्रियता बढाएका थिए ।

सोमबार र मंगलबार नेताहरु एनपी साउद, गगन थापा, चन्द्र भण्डारी, गुरु घिमिरे, गोविन्द शाह, सुरेन्द्र पाण्डे, धनराज गुरुङ, भीष्म आङदाङ्बे लगायतको टोलीले सभापति देउवा र वरिष्ठ नेता रामचन्द्र पौडेललाई भेट गरि समस्या समाधानको पहल गरेको थियो ।