सरकारकाे चेतावनी पछि वढी लिएकाे शुल्क फिर्ता गर्न मेडिकल सञ्चालक तयार

काठमाडाैं- सरकारले अल्टिमेटम  दिएलगत्तै निजी मेडिकल कलेजहरू विद्यार्थीबाट असुल गरेको वढी शुल्क फिर्ता गर्न तयार भएका छन् । शिक्षा विज्ञान तथा प्रविधिमन्त्री गिरिराजमणि पोखरेलसँग साेमबार भएको वार्तापछि कलेज संचालकहरू तोकिएकोभन्दा बढी शुल्क फिर्ता गर्न तयार भएका हुन् ।

शिक्षामन्त्री चिकित्सा शिक्षा आयोगका उपाध्यक्ष प्राडा. श्रीकृष्ण गिरी र मेडिकल कलेज संचालकबीचको छलफलमा कलेज संचालकहरूले भोलि (मंगलबार) नै रकम फिर्ता गर्ने खाका सरकारलाई बुझाउने प्रतिबद्धता जनाएको मन्त्रालयले जनाएकाे छ।उनीहरूले बुझाएको खाकाका आधारमा सरकार, आन्दोलनरत विद्यार्थी र संचालकहरूको बैठक बसेर शुल्क फिर्ता गर्ने सहमति भएको हो ।

मेडिकल कलेजहरूले बढी शुल्क असुलेको भन्दै पीडित विद्यार्थीहरू दुई महिनादेखि आन्दोलनरत छन् ।सरकारले शुल्क फिर्ता नगरे संचालकलाई पक्राउ गरी बढी शुल्क असुल गर्ने र ठगी मुद्दा  चलाउने बताएपछि संचालकहरू लचक बनेका हुन् ।

सोमबार गृहमन्त्री रामबहादुर थापा (बादल), शिक्षामन्त्री गिरिराजमणि पोखरेल, महान्यायधिवक्ता अग्नि खरेल, प्रहरी महानिरीक्षक सर्वेन्द्र खनाललगायतको बैठकले विद्यार्थीबाट असुलेको अतिरिक्त शुल्क भोलिसम्ममा फिर्ता नगरे कारबाही थाल्ने निर्णय गरेको थियो ।

निर्णयलगत्तै मन्त्री पोखरेलले कारबाही प्रक्रिया अगाडि बढाउने भन्दै सरोकारवालालाई छलफलमा बोलाएका थिए । छलफलमा मेडिकल कलेज संचालकहरूले आफूहरू पैसा फिर्ता गर्न तयार रहेको बताएका हुन् ।