कांग्रेस र नेमकिपा पँधेरोका भ्यागुता हुन् – सांसद बस्नेत

भक्तपुर- नेपाल कम्युनिष्ट पार्टी (नेकपा)का प्रभावशाली युवा नेता, राष्ट्रिय युवा संघ नेपालका इन्चार्ज, पूर्वमन्त्री तथा प्रतिनिधिसभाका सांसद महेश बस्नेतले प्रमुख प्रतिपक्षी दल नेपाली कांग्रेस र नेपाल मजदुर किसान पार्टी (नेमकिपा) एउटा पँधेरो भित्रको भ्यागुतो जस्तो मात्र भएको उल्लेख गर्नुभएको छ ।

मंसिर १४ गते हुन गइरहेको उपनिर्वाचनमा भक्तपुर क्षेत्र नं. १ (क)का नेकपाको तर्फबाट उम्मेदवार रहनुभएको देवी प्रसाद ढकाल (डिपी)लाई विजयी गराउन आयोजना गरिएको वृहत युवा भेलालाई शनिवार सम्बोधन गर्दै सांसद बस्नेतले भन्नुभयो, ‘नेमकिपा र कांग्रेस एउटा पँधेरो भित्रको भ्यागुतो मात्र हो, बाहिर निस्कन्जेल फुर्ति लगाउँछ, कि मैले संसार देखे भनेर र कसैले कत्रो हुँदो रहेछ संसार भन्यो भने पेट फुलाएर यो भन्दा ठूलो अनि त्यो भन्दा पनि ठूलो भन्दा भन्दै पेट फुटेर मरेछ । नेमकिपा भक्तपुर नगरपालिकाको कचौरा भित्र रमाइरहेको छ र पेट फुटेर मर्ने अवस्थामा पुगेको छ । कांग्रेसको पनि हालत सोही अनुसार नै छ ।’

देशभर नेकपाको जनलहर देखेर केही गिद्धे नजर भएका मिडियाहरुले जनतामा भ्रम छर्ने कार्य समेत हुन सक्ने उल्लेख गद्र्यै उहाँले त्यस्त प्रकारका मिडियासँग अत्तीनुको कुनै जरुरी नभएको बताउनुभयो । युवा संघ युवाहरुको सहि मार्ग निर्देशन गर्ने कारखाना रहेको उल्लेख गर्दै उहाँले भन्नुभयो, ‘युवा संघले बनाएको पिनिसिङ उत्पादन कस्तो हुन्छ भनेर सवै जनतालाई छर्लङ्ग छ । युवा संघकै उत्पादनमा सम्माननीय प्रधानमन्त्री केपी शमौ ओली, नेकपाका अध्यक्ष पुष्प कलम दाहाल प्रचण्ड, महेश बस्नेत, गोकर्ण विष्ट, रामप्रसाद सापकोटा ‘दिपशिखा’ लगायतका असंख्या देशको कार्यकारी पदमा पुगी मुलुकलाई समृद्ध र विकसित बनाउने महान संकल्पका साथ तिव्र गतिले अघि बढिरहनुभएको छ ।’

युवा संघको प्रवेशसँगै देशको नेतृत्व गर्न सक्ने क्षमताको विकास हुने उल्लेख गर्दै उहाँले राष्ट्रवादी युवा निर्माण गर्ने थलो भनेको युवा संघ भएको स्पष्ट पार्नुभयो । उहाँले भन्नुभयो, ‘नेपालका सीमा लिपुलेक, कालापानी, लिम्पुयाधुरालगायतका क्षेत्रमा नेपालमाथि भारतले धावा बोलेमा त्यसमा युवाले प्रतिवाद गर्छ, नेपालको झण्डा फहराउँछन् । राष्ट्रियताको पक्षमा शिर झुकाउँदैन । सरकारले कुटनीतिक तवरले समस्या समाधान गर्ने प्रकृया अघि बढाएको छ । यदी उक्त प्रकृयाबाट समस्या समाधान नभई युवा संघले जुनसुकै मुल्य चुकाएर भएपनि आफ्नो जमिनको रक्षा गर्छ । पहिलो चरणमा कुटनीतिक त्यसपछि भएन भने अन्तर्राष्ट्रियकरण साथै संयुक्त राष्ट्र संघ जानुपरे पनि जान युवा संघ तयार छ ।’

कसैले दवाप तथा आर्थिक प्रलोभनमा पार्ने प्रयास गर्छ भने प्रतिवाद गर्न युवा संघका नेता तथा कार्यकताृलाई निर्देशन दिँदै सांसद बस्नेतले भक्तपुरमा कांग्रेस र नेमकिपा शुन्य बनाउने अभियान चलाउन समेत युवालाई निर्देशन दिनुभएको छ । उहाँले भन्नुभयो, ‘अर्को पटकको निर्वाचनबाट भक्तपुरमा कही कतै पार्टी प्रवेश गराउने वातावरण आवश्यक नहुने गरी काम गर्नुस् । उपनिर्वाचनमा कांग्रेस तथा नेमकिपाको भोट किनवेट गर्ने विशेष गतिविधिको निगरानिी गर्नुस् । साँझ परेपछि प्रहरीसँग समन्वय गरी गस्ती गर्नुस्, गरिव, असाहाय वस्तीमा भोटको किनवेच हुन सक्छ यसलाई रोक्नुस् आफ्नो तवरले लाग्नुस् । पैसा बाडेको भेटे कब्जा गर्नुस् । उक्त रकम सामाजिक कार्यमा प्रयोग गरौंला । भोटमा घुनपुतली नलागोस्, कहि कतैबाट दवाप आए सम्पर्कमा वस्नुस्, आवश्यक कदम संगठन तथा पार्टीले चलाउँछ । तपाईहरु कुनै पनि कुरामा आत्तीनु पर्दैन ।’

नेमकिपालाई १ नं. क्षेत्रमा विजयी गराउनु नै क्षत्रे नं. १ विकासमा पछि परेको उल्लेख गर्दै उहाँले आगामी निर्वाचनमा ‘एक वुथ १०० युथ’ को अभियानलाई प्रभावकारी ढंगले प्रयोग गर्न आग्रह गर्नुभयो । भक्तपुरमा अब नेकपाले सयौं वर्ष सेवा जनताको मतबाट विजयी भई जनताको सेवामा समर्पित हुने उद्घोष गर्दै उहाँले भन्नुभयो, ‘सात दिन नेकपालाई सेवा गर्नुस्, पाँच वर्ष तपाईलाई नेकपाले सेवा गर्छ । युवा साथीहरु अव नेकपाको उम्मेदवार विजयी नभएसम्म २४शैं घण्टा खट्नुस्, पार्टीले तपाईको मुल्याङ्कन गर्छ ।’

भक्तपुरमा एक सय एक नेता रहेको र आवश्यक परे सिंहासनमा बसेको सिंहलाई थर्काउन सक्ने क्षमता रहेको उल्लेख गर्दै उहाँले नेकपामा प्रवेशसँगै कांग्रेस र नेमकिपाको सातोपुत्लो गएको समेत बताउनुभयो ।

नेकपाका केन्द्रीय सदस्य, भक्तपुरका सहइन्चार्ज तथा चाँगुनारायण नगरपालिकाका प्रमुख सोम मिश्रले भक्तपुरमा नेकपाको नेतृत्व आउसँगै विकासका चारै तिरका ढोका खुल्ला गरेको उल्लेख गर्नुभयो । विगतको लामो समय कांग्रेस र नेमकिपाले भक्तपुरको विकासलाई अन्धकारमा पुर्याएको उल्लेख गर्दै अब जनताको चाहना र आवश्यकता अनुसारको विकासमा कुनै कमि नहुने समेत प्रतिवद्धता जनाउनुभयो ।

कार्यक्रममा संघका संयोजक रामप्रसाद सापकोटा ‘दिपशिखा’ले युवा संघ देशमा युवाहरु आर्थिक समृद्धिमा जाडिनु पर्नेमा जोड दिँदै रोजागरी ग्यारेन्टीका आधारहरु तयार पारिरहेको जानकारी गराउनुभयो । उहाँले युवाले अब तत्कालै देश विकास र समृद्धिका अभियान शुरु गर्ने उद्घोष गर्दै अब तत्काल युवालाई विकास र उत्पादनमा जोड्ने कार्यक्रमहरु ल्याउने जानकारी गराउनुभयो । उहाँले अबको युवाको अभियान सडक निर्माणको अभियानमा समेत लगाउने जानकारी गराउँदै वेरोजगार युवा संघको सदस्याता हुन नसक्ने बताउनुभयो ।