छुटेपछि हाँस्दै बाहिरिए उद्योगी डा. रूप ज्योति

काठमाडाैं-ठगी आरोपको अनुसन्धान सिलसिलामा प्रहरी हिरासतमा रहेका उद्योगी डा. रूप ज्योति छुटेका छन् । उनीविरुद्ध ठगी आरोपमा जाहेरी दिने विज्ञेन्द्रकृष्ण मल्लले जाहेरी फिर्ता लिएपछि डा. ज्योति छुटेका हुन् ।

उनलाई दरबारमार्ग प्रहरी हिरासतमा राखिएको थियो । डा. ज्योतिविरुद्ध मल्लले ठगी आरोपमा प्रहरीमा जाहेरी दिएका थिए । डा. ज्योति २१ कात्तिकमा पक्राउ परेका थिए ।

डा. ज्योतिसहित उनको परिवारको सेयर रहेको भनिएको ल्याण्डमार्क डेभलपर्सले घर बनाएर दिन्छु भनेर पैसा लिएको तर पछि जग्गा नै अर्कैलाई बिक्री गरेर आफूलाई ठगेको मल्लको आरोप थियो । मल्लले १ करोड २६ लाख रुपैयाँ बैना रकम दिएका थिए ।

पछि डा. ज्योतिले मल्ललाई बैनबापतको रकम फिर्ता लिन अनुरोध गरेको तर यस्तो रकम नलिने अडान मल्लले लिएका थिए । मल्लले यस्तो अडान लिएपछि डा. ज्योतिले सो रकम अदालतमा कोर्ट फि तिरेर थैली झुण्ड्याएका थिए ।

डा. ज्योतिले १३ मंसिर २०७५ मा जिल्ला अदालत काठमाडौंमा मल्ललाई रकम तिरिपाऊँ भन्दै थैली झुण्ड्याएको ३ दिनपछि अर्थात् १६ मंसिर २०७५ मा प्रहरीमा ठगी अभियोगमा जाहेरी दिएका थिए ।

मल्लको यस्तो जाहेरीपछि २० मंसिर २०७५ मा जिल्ला अदालत काठमाडौंले डा. ज्योतिसहित उनको परिवारका ११ जना सदस्यलाई नै पक्राउ गरी अनुसन्धान गर्न प्रहरीलाई अनुमति दिएको थियो । अदालतको यस्तो अनुमतिविरुद्ध डा. ज्योति सर्वाेच्च अदालतमा निषेधाज्ञाको आदेश माग्दै गएका थिए ।

तर, सर्वाेच्चले डा. ज्योतिको निषेधाज्ञा जारी गर्न नमानेपछि उनी २१ कात्तिक २०७६ मा पक्राउ परेका थिए । डा. ज्योतिसँगै उनकी छोरी सुरुचिलाई पनि प्रहरीले पक्राउ गरेको छ । डा. ज्योति दरबारमार्ग प्रहरीको हिरासतमा थिए ।

डा. ज्योति र मल्लबीच २८ कात्तिकमा सो लेनदेनसम्बन्धी विवाद मिलेको थियो । मल्ललाई डा. ज्योतिले ४ करोड रुपैयाँ दिने सहमति भएपछि विवाद मिलेको हो । यस्तो विवाद मिलेसँगै सरकारी वकिलको कार्यालयले उनीविरुद्ध मुद्दा नचलाउने प्रक्रिया अगाडि बढेको थियो ।

दुवै पक्ष मिलेका कारण विवाद मिलेको हो । विवाद मिलेसँगै ज्योति छुटेका हुन् । उनीविरुद्धको मुद्दा भने अझै सकिएको छैन । मुद्दा फिर्ता लिनका लागि महान्यायाधिवक्ताले स्वीकृति दिनुपर्नेछ । यो प्रक्रिया बाँकी रहेका कारण डा. ज्योतिलाई नियमित हाजिर जमानीमा छोडिएको छ ।