अब कर्मचारीले ६० वर्षसम्म जागिर गर्नुपर्ने

काठमाडाैं-निजामती कर्मचारीको उमेर हद ६० वर्ष पुर्‍याउने निर्णय संसद्को राज्य व्यवस्था तथा सुशासन समितिले गरेको छ ।

संघीय निजामती सेवाको गठन, सञ्चालन र सेवाका शर्तहरूको व्यवस्था गर्न बनेको विधेयकमाथिको दफावार छलफलका क्रममा समितिले कर्मचारीको उमेर हदसम्बन्धी दफा पास गरेको हो ।

विधेयकको दफा ५० मा ‘साठी वर्ष उमेर पूरा भएको निजामती कर्मचारीले निजामती सेवाबाट स्वतः अवकाश पाउनेछ’ भन्ने उल्लेख छ ।

हाल कर्मचारीको उमेर हद ५८ वर्ष रहेको छ ।

संसद् सचिवालय सिंहदरवारमा बिहीवार बसेको समितिको बैठकले उमेरहदसम्बन्धी दफा पास गरेको सांसद डिला संग्रौलाले लोकान्तरलाई जानकारी दिइन् ।

‘कर्मचारीको उमेरहद ६० वर्ष बनाउने कुरा पास भयो, अन्य विषयमा छलफल चलिरहेको छ’ संग्रौलाले भनिन् ।