सिन्धुपाल्चाेक बस दुर्घटनामा परेका ८१ घाइते उपचारपछि घर फर्के

काठमाडाैं-सिन्धुपाल्चोकमा एघारजनाको ज्यान जाने गरी भएको बडहरे बस दुर्घटनाका घाइते विभिन्न अस्पतालमा उपचारपछि घर फर्कन थालेका छन्। शनिबारसम्म ८१ घाइते उपचारपछि घर फर्केका छन्। अझै २५ घाइते विभिन्न चार अस्पतालमा उपचाररत छन्।

हेलम्बु यातायातको बा२ख २७१५ नम्बरको बस शुक्रबार चौतारा–सिपाघाट कच्ची सडक खण्डको इन्द्रावती गाउँपालिका–१०, भोटसिपा, बडहरे तिखुमोडमा दुर्घटनाग्रस्त हुँदा चालक र एकै गाउँका सातसहित ११ यात्रुको मृत्यु भएको थियो।

क्षमताभन्दा तेब्बरा बढी झन्डै एक सय २० यात्रु बोकेको सो बसका एक सय ६ जना घाइते भएका थिए। दुर्घटनापछि हेलिकोप्टर र सवारी साधनबाट उद्धार गरी घाइतेलाई उपचारका लागि विभिन्न पाँचवटा अस्पताल पु-याएको थियो।

‘घाइतेहरु उपचारपछि स्वास्थ्य लाभ गरी धमाधम घर फर्किइरहेका छन्,’ जिल्ला प्रहरी कार्यालयका सूचना अधिकारी डिएसपी माधव काफ्लेले शनिबार नागरिकसँग भने। विभिन्न अस्पतालमा अहिले उपचाररतमध्ये ६ घाइतेको अवस्था चिन्ताजनक रहेको उनले बताए। प्रहरीका अनुसार काभ्रेको धुलिखेल अस्पतालमा उपचार गराइरहेका ६६ मध्ये ५२ यात्रु घर फर्किसकेका छन्। त्यहाँ अझै १४ घाइतेको उपचार भइरहेको छ।