स्वास्थ्य परीक्षणका लागि प्रधानमन्त्री ओली टिचिङमा, मुटुबाट निकालियो क्याथेटर

काठमाडौं-  प्रधानमन्त्री केपी शर्मा ओली स्वास्थ्य परीक्षणका लागि त्रिवि शिक्षण अस्पताल महाराजगञ्ज पुगेका छन्।

उनी नियमित मुटु परीक्षणका क्रममा त्रिवि शिक्षण अस्पतालस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टर गएका हुन्।

प्रधानमन्त्री केपी शर्मा ओलीको मुटुमा राखिएको क्याथेटर बुधबार बिहान मनमोहन कार्डियोथोरासिक भास्कुलर तथा ट्रान्सप्लान्ट सेन्टरले निकालिदिएको छ।

प्लाज्मा फेरोसिस गर्दा सिंगापुरमा ओलीको मुटुमा क्याथेटर राखिएको थियो।

मुटुरोग विशेषज्ञहरुका अनुसार बिरामीको हात तथा खुट्टाको नसाबाट तार पठाएर गरिने जाँच र उपचार पद्धतिलाई क्याथेटर भन्ने गरिन्छ ।

मिर्गौलामा एन्टीबडीको मात्रा बढेपछि प्लाज्मा फेरेसिस विधिबाट प्रधानमन्त्रीको मुटुमा क्याथेटर राखिएको थियो ।

ओली अघिल्लो साता मात्रै सिंगापुरबाट उपचार गराएर फर्किएका थिए। ओलीलाई मृगौलासम्बन्धी समस्या छ ।

सिंगापुरमा स्वास्थ्य परीक्षण गरेर हालैमात्र स्वदेश फर्किएका प्रधानमन्त्रीले यसअघि पनि पटकपटक सोही अस्पतालमा परीक्षण गराएका छन्। 

ओलीले गत वर्ष पनि सो अस्पतालमा भर्ना भएर मुटुको उपचार गराएका थिए।