भारतमा कारको बिक्री व्यापक गिरावट

नयाँ दिल्ली- पछिल्लो सयम भारतमा सवारी बिक्री निरन्तर ओरालो लागेको छ। २०१९ को अगस्टमा प्यासेन्जर कार उत्पादक कम्पनी मारुती सुजुकी, हुन्डाई, महिन्द्रा, टाटा तथा होन्डालगायत कम्पनीको कार बिक्री घटेको हो।

भारतमा सर्वाधिक बढी कार बिक्री गर्ने कम्पनी मारुती सुजुकीको बिक्री ३३ प्रतिशतले घटेर १ लाख ६ हजार ४ सय १३ वटामा सीमित भएको छ। यो अगस्ट महिनाको तथ्यांक हो।

मारुतीको सबैभन्दा धेरै कार कम्प्याक्ट सेगमेन्ट (स्विफ्ट, सेलेरियो, इग्निस, बोलेनो र डिजायर)को बिक्री २०१८ को अगस्टको तुलनामा यो वर्ष २३.९ प्रतिशतले घटेर ५४ हजार २ सय ७४ वटामा सीमित भएको छ।

त्यस्तै महिन्द्राको समग्र प्यासेन्जर कारको बिक्री अघिल्लो वर्ष ४५ हजार ३ सय ७३ वटा बिक्री भएकोमा २०१९ को अगस्टमा ३६ हजार ८५ वटामात्र बिक्री भएको छ। होन्डाले भारतमा २०१८ अगस्टमा १७ हजार २० वटा कार बिक्री गरेकोमा यो वर्ष ८ हजार २ सय ९१ वटा बिकेको तथ्यांक छ।