बुधबार पूरा हुँदै प्रधानमन्त्री ओलीको उपचार

काठमाडौं- ११ दिनदेखि सिंगापुरमा उपचाररत प्रधानमन्त्री केपी शर्मा ओलीको उपचार बुधबार पूरा हुने भएको छ। प्रधानमन्त्रीका प्रेस सल्लाहकार कुन्दन अर्यालले आइतबार जनाए अनुसार बुधबार सातौं चरणको प्लाज्माफेरेसिस पूरा हुने भएको हो।

बुधबार सातौं अर्थात अन्तिम चरणको रुपमा प्लाज्मा फेरेसिस गरिसकेपछि उपचार पूरा हुने प्रधानमन्त्रीका निजी चिकित्सक दिलिप शर्मालाई उदृत गर्दै प्रेस सल्लाहाकार कुन्दन अर्यालले ट्विट गरेका छन्।

हालसम्म पाँच पटक सोही प्रक्रियाबाट मिर्गौलासम्बन्धी एन्टीबडीलाई निराकरण गरिएको छ। सोमबार छैटौं र बुधबार सातौं चरणको प्रक्रिया सम्पन्न भएसँगै उपचार पुरा हुने जनाइएको छ। त्यसपछि थप चेकअपको काम हुने प्रेस सल्लाहाकार अर्यालले बताए।

आइतबार अर्यालले प्रधानमन्त्रीको स्वास्थ्य अवस्थासम्बन्धी जानकारी दिदै एउटा ट्वीटसमेत गरेका छन् । उनले ट्वीटरमा लेखेका छन्- ‘सम्माननीय प्रमको प्लाज्मा फेरेसिस प्रकृयाबाट मृगौलासम्बन्धी एन्टबडीलाई निराकरण गर्ने उपचार जारी छ। प्रमसँगै रहनुभएका उहाँका निजी चिकित्सक डा दिलिप शर्माका अनुसार सोमबार छैठौं र बुधबार सातौं चरणको प्रकृया सम्पन्न भएसँगै उपचार पूरा हुनेछ। प्रमको स्वास्थ्य अवस्था सामान्य छ।’

अर्यालले बाहिर हल्ला भएजस्तो मृगौला नै फेर्ने भन्ने विषयमा कुनै तयारी नभएको र प्रधानमन्त्रीको अवस्था पनि त्यस्तो नभएको बुझिएको छ। ‘उहाँको अवस्था सामान्य छ। मृगौलामा देखिएको केहि समस्या प्लाज्मा फेरेसिसमार्फत निराकरण हुन्छ,’ उनले भने।

प्रधानमन्त्री गत भदौ ५ गते दोस्रो चरणको स्वास्थ्य उपचारका लागि सिंगापुर प्रस्थान गरेका थिए। उनको नेसनल युनिभर्सिटी अस्पतालमा उपचार भइराखेको छ। १० दिनका लागि भनेर गएपनि कहिले फर्किने भन्ने एकिन हुन सकेको छैन।

गत साउन १८ देखि २७ गतेसम्म सिंगापुरको सोही अस्पतालम पुगेर उपचार गराएर फर्किएका थिए। तर, फेरि समस्या देखिएपछि उनी भदौ ५ गते सिंगापुर गएका हुन्।