भीरबाट खसालेर गाई मार्नेलाई कारबाही माग्दै सहरी विकासमन्त्रीले लेखे यस्तो पत्र

सुर्खेत- नेपालगन्जको कान्जीहाउसबाट दैलेख लैजाँदै  गरिएका गाईलाई सुर्खेतको वीरेन्द्रनगरमा भिरबाट खसालिएको पाइएपछि सहरी विकासमन्त्री मोहम्मद इस्तिया राईले छानबिन गर्न माग गरेका छन्।

शुक्रबार गृह मन्त्रालयलाई पत्र लेख्दै मन्त्री राईले दोषी पत्ता लगाई कारबाही समेत गर्न माग गरेका छन्। 

बिहीबार राति ११ बजे नेपालगन्जबाट आठ वटा ट्रकमा २ सय ९१ वटा गाई र गोरुलाई सोतर्फ लगिएको थियो। कर्णाली प्रदेशको राजधानी वीरेन्द्रनगरको बाटो हुँदै दैलेख लैजाने क्रममा वीरेन्द्रनगर-८ को कटकुवामा गाईहरुलाई बिहान ३ बजे ट्रकबाट ओरालिएको थियो।

सोपश्चात् गाईलाई भीरबाट खसालिएको थियो। जसमध्ये १६ वटा गाईको शव भेटिइसकेको छ भने अन्यको खोजी भइरहेको प्रहरीले जानकारी दिएको छ।

मन्त्री राईले घटनामा संगग्न व्यक्तिलाई आवश्यक कारबाहीका लागि आफूलाई विभिन्न माध्यमबाट सूचना तथा अनुरोध आइरहेकोले कानुनविपरीत राष्ट्रिय जनावरको बध तथा हत्याका सम्बन्धमा आवश्यक छानबिन तथा कारबाहीका लागि अनुरोध गरेका छन्।

घटनालाई लिएर जनमानसबाट आक्रोशपूर्ण अभिव्यक्ति आइरहेको बताउँदै उनले गृह मन्त्रालयलाई छानबिनका लागि अनुरोध गरेका हुन्।

प्रहरीका अनुसार बिहीबार राति साढे १२ बजेतिर चौपाया बोकेका ८ ट्रक सुब्बाकुना प्रहरी चौकीमा इन्ट्री भएका थिए। गाईगोरु छोडेर नेपालगञ्ज फर्कंदै गरेका ५ वटा ट्रकलाई बबईबाट प्रहरीले नियन्त्रणमा लिई अनुसन्धान गरिरहेको जनाएको छ।