कास्की र मकवानपुरका छुट्टाछुट्टै दुर्घटनामा ५ को मृत्यु, ३ घाइते

काठमाडौं- मकवानपुर र कास्कीमा भएका छुट्टाछुट्टै सवारी दुर्घटनामा परी ५ जनाको मृत्यु भएको छ भने अन्य ३ जना घाइते भएका छन्।

मकवानपुरको हेटौंडा–५ मा गएराति मोटरसाइकलले ठक्कर दिँदा साइकलयात्री मकवानपुरगढी–४ का ४० वर्षीय सोमलाल घलानको मृत्यु भएको प्रहरीले जनाएको छ।

त्यस्तै अटोरिक्साको ठक्करबाट घाइते पैदलयात्री हेटौंडा–११ का ५० वर्षीय नारायण लम्सालको उपचारको क्रममा गए राति मृत्यु भएको प्रहरीले जानकारी दिएको छ।

हेटौंडा-११ मा अटोको ठक्करले गम्भीर घाइते भएका उनको उपचारको क्रममा भरतपुरमा मृत्यु भएको हो।

बुधबार साँझ नै मकवानपुरगढी–२ मा चट्याङका कारण एक जनाको मृत्यु भएको छ। घरनजिक बसिरहेको अवस्थामा चट्याङ लागेर गम्भीर घाइते भएकी ३० वर्षीय सुन्तली विकलाई उपचारका लागि हेटौंडा लाने क्रममा बाटोमै मृत्यु भएको जनाइएको छ।

हेटौँडाका सवारी दुर्घटनामा संलग्न प्रदेश २-०३००१ प ९३९० नम्बरको मोटरसाइकलका चालक रोशन दुलाल तथा ना २ ह १८९० नम्बरको अटो चालकलाई प्रहरीले नियन्त्रणमा लिएको छ।

यस्तै पोखरामा गएराति भएका दुई छुट्टाछुट्टै दुर्घटनामा दुईजनाको मृत्यु भएको छ भने तीन घाइते भएका छन्। पोखरा महानगरपालिका-३२ गगनगौंडामा गएराति ग ७ प ७४२८ नम्बरको मोटरसाइकल र ग ११ प २३५८ नम्बरको स्कुटर एकापसमा ठोक्किँदा स्कुटरको पछाडि बसेका पोखरा नदीपुर निवासी १८ वर्षीय जगबिन पुनको मृत्यु भएको जिल्ला प्रहरी कार्यालय कास्कीका प्रहरी नायब उपरीक्षक राजकुमार केसीले जानकारी दिए।

ठक्करपछि ट्रकको चक्कामुनि परेर गम्भीर घाइते भएका पुनको पोखरा स्वास्थ्य विज्ञान प्रतिष्ठानमा उपचारका क्रममा मृत्यु भएको थियो। सो दुर्घटनामा लेखनाथ भण्डारढीकका विकल सुनार र रुपा–७ का दीपक विक तथा पोखरा अर्चलबोटका निशान गुरुङ घाइते भएका छन् ।
गए राति नै पृथ्वीराजमार्गस्थित लेखनाथको तालचोकमा भएको अर्को दुर्घटनामा काठमाडौं कीर्तिपुरका २८ वर्षीय थमन पाइजाको मृत्यु भएको छ ।

ग ३ च १४२२ नम्बरको मिनीभ्यान र बा ९४ प १७०५ नम्बरको मोटरसाइकल राति ९:४५ बजेको समयमा एकापसमा ठोक्किँदा घाइते भएका पाइजाको मणिपाल शिक्षण अस्पतालमा उपचारका क्रममा मृत्यु भएको प्रहरीले जनाएको छ।