प्रधानमन्त्री केपी ओली सिंगापुर नजाने

काठमाडाैं-प्रधानमन्त्री केपी शर्मा ओली उपचारका लागि सिंगापुर नजाने भएका छन् |

प्रधानमन्त्रीका प्रमुख राजनीतिक सल्लाहकार बिष्णु रिमालले ट्वीट गर्दै त्यस्तो कुरा बताएका हुन् ।

प्रधानमन्त्री सिंगापुरमा स्वास्थ्य परीक्षण गरी स्वदेश फर्किए लगत्तै पार्टी र सरकारको कामको धपेडीका कारण थकित भएको र त्यसै कारण बिहीबारको सचिवालय बैठक शुक्रबार बस्ने गरी स्थगित गरिएको रिमालले बताएका छन् ।

प्रधानमन्त्री शुक्रबार बिहानैदेखि नियमित भेटघाट र बैठकमा सहभागी हुने रिमालले पनि बताएका छन् ।

प्रधानमन्त्री बिहीबार दिउँसो अस्वस्थ भएको खबर आएपछि साँझपख उपचारमा संलग्न चिकित्सकलाई उद्धृत गर्दै प्रधानमन्त्री ओलीको मिर्गौलामा क्रेटिनिनको मात्रा बढ्दै गएकाले सिंगापुर लैजाने तयारी भइरहेको समाचार बाहिरिएको थियो ।

उपचारमा संलग्न डा. अरुण सायमीको भनाइ उद्धृत गर्दै पुनः सिंगापुर लैजाने समाचार बाहिर आएको थियो । त्यसपछि रिमालले ट्विट मार्फत प्रतिक्रिया जनाउँदै ‘मिडियामा संप्रेषित अफवाहहरू निराधार’ भएको बताए ।