व्यवसायी चण्डीराज ढकाललाइ ऋण नतिरेकाे अभियाेगमा मुद्दा चलाउने तयारी

काठमाडौं – तत्काल पैसा नतिरे व्यवसायी चण्डीराज ढकालमाथि बैंकिङ कसुरको मुद्दा लाग्ने भएको छ । पूर्ण सरकारी स्वामित्वको राष्ट्रिय वाणिज्य बैंकले चण्डीराजलाई बैंकिङ कसुुरको मुद्दा लगाउने भएको हो ।

‘चण्डीराजजीले वर्षौअघि लिएको ऋणको साँवा र ब्याज तिर्नु भएको छैन, केही दिनभित्रै हामी अन्तिम अवसर दिन्छौं, नभए ऋण असुलीको कानूनी प्रक्रिया अघि बढाउँछौं’ राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठले  भने ।

सीईओ श्रेष्ठका अनुसार आगामी एक साताभित्र ढकाललाई बोलाएर अन्तिम अवसर दिने र उक्त अवसरमा पन ऋण चुक्ता नगरे बैंकले कानूनी प्रक्रिया अघि बढाउनेछ ।

‘दुई महिनादेखि चण्डीराजजी हाम्रो सम्पर्कमा आउनु भएको छैन, अब हामी पर्खेर बस्न सक्ने अवस्थामा छैनौं’ उनले भने, ‘२/४ दिनभित्रै ठोस निश्कर्ष नआए हामी कानूनी प्रक्रिया अबलम्बन गर्न बाध्य हुनेछौं किनभने हामीले उहाँलाई यसअघि पनि धेरै पटक अवसर प्रदान गरिसकेका छौं ।’

ढकालले वाणिज्य बैंकबाट १५ वर्षअघि ३१ करोड रुपैयाँ ऋण लिएका थिए । उनले अहिलेसम्म सावाँ ब्याज केही पनि तिरेका छैनन् । सावाँ र व्ययाज गरी ढकालले अहिले करिब डेढ अर्ब रुपैयाँ तिर्नुपर्ने देखिन्छ ।