कांग्रेसमा पाैडेलले देखाए शक्ति

काठमाडाैं-नेपाली कांग्रेसले नेता रामचन्द्र पौडेलको गृह जिल्ला तनहुँमा समानान्तर जिल्ला कार्यसमिति बनाउने पार्टीका पूर्वसहमहामन्त्री गोविन्दराज जोशीको समूहलाई कारवाही गर्ने निर्णय गरेको छ ।

पार्टीको बुधबार केन्द्रीय कार्यालय सानेपामा बसेको बैठकमा केन्द्रीय अनुशासन समितिका संयोजक भीष्मराज आङ्दम्बेले पेश गरेको कार्यप्रगति प्रतिवेदनले तनहुँ जिल्लामा बैकुण्ठनाथ न्यौपाने सभापति र जितप्रकाश आले कार्यवाहक सभापति नै आधिकारिक भएको जनाएको जनाएको छ ।

कार्यवाहक सभापति आले रहेको जिल्ला कार्यसमिति र सो मातहतका कार्यसमिति मात्र नेपाली कांग्रेसको आधिकारिक र वैधानिक कार्यसमितिहरु रहेको स्पष्ट गर्दै आङ्दम्वेले कांग्रेसका नाममा पार्टीका कुनै सदस्यले कुनै तहको कार्यसमिति गठन गर्न नै नसक्ने बताएका छन् ।

‘आले नेतृत्ववाहेकको तनहुँ जिल्लामा यदि त्यस्तो अनाधिकृत र अवैधानिक कार्य पार्टीको कुनै सदस्यले गरेको वा कार्यालय खोलेको भए त्यस्तो कार्य पार्र्टी अनुशासनको गम्भीर उल्लघंन र दण्डनीय कार्य भएकोले, पार्टीका कुनै पनि सदस्यहरु यस्तो भ्रममा नपर्न र पार्टीको आधिकारिक र वैधानिक निकायमा मात्र आवद्ध हुन अनुरोध गरिएको छ’, कांग्रेसको निर्णयमा भनिएको छ ।

कांग्रेसले तनहुँ जिल्ला प्रशासन कार्यालय तथा जिल्लास्थित अन्य सरकारी, अर्धसरकारी तथा गैरसरकारी कार्यालय, संघ संस्थाहरुले पनि नेपाली कांग्रेसको आधिकारिक जिल्ला कार्यसमिति र मातहतका निकायसंग मात्र नेपाली कांग्रेससँगको दलगत सम्बन्ध कायम राख्न र गतिविधि गर्न जानकारी गराएको छ ।

पार्टीले अनुशासनको गम्भीर उल्लघंनको गतिविधिमा संलग्न पार्टीका सदस्य उपर पार्टीको विधान र नियमावली अनुसार आवश्यक निर्णय गर्नका लागि केन्द्रमा प्राप्त उजुरीसहितको फायल र सबै कागजात केन्द्रीय अनुशासन समितिमा पठाउन निर्देशन दिएको छ ।

कांग्रेस महामन्त्री डा. शशांक कोइराला र प्रवक्ता विश्वप्रकाश शर्मा बिदेशमा भएको बेला केन्द्रीय कार्यसमितिको बैठक ११ भदौसम्म स्थगित गरिएको छ ।