प्रधानमन्त्री ओली सातापछि आज स्वदेश फर्कँदै

काठमाडौं- एक साता लामो स्वास्थ्य परीक्षणपछि प्रधानमन्त्री केपी शर्मा ओली आज स्वदेश फर्किेने भएका छन् । साउन १८ गते सिंगापुर प्रस्थान गरेका प्रधानमन्त्री ओली स्वास्थ्य परीक्षण सकाएर आज स्वदेश फर्कन लागेका हुन् ।

प्रधानमन्त्री ओली थाई एयरलाइन्सको विमानबाट अपराह्न १२ः२५ बजे त्रिभुवन अन्तर्राष्ट्रिय विमानस्थलमा अवतरण गर्ने जनाइएको छ ।

आइतबार नै प्रधानमन्त्री फर्कने तय भए पनि रिपोर्ट आउन ढिला भएपछि सिंगापुरको बसाइ १ दिन लम्बिएको प्रधानमन्त्रीको सचिवालयले जनाएको थियो । प्रधानमन्त्रीको रिपाेर्ट सन्तोषजनक आएको प्रधानमन्त्रीका प्रेस संयोजक चेतन अधिकारीले बताए ।

१२ वर्षअघि मिर्गौला प्रत्यारोपण गराएका ओलीले यसअघि भारत र थाइल्यान्डमा आफ्नो नियमित स्वास्थ्य परीक्षण गराउने गरेका थिए । तर यसपटक उनी चिकित्सकको सल्लाहअनुसार, सिंगापुरको नेसनल युनिभर्सिटी हस्पिटलमा स्वास्थ्य परीक्षणका लागि गएका थिए ।