बोलबम मनाउन सुन्दरीजल गएका युवकको मृत्यु

काठमाडौं- बोलबम मनाउने क्रममा सुन्दरीजल पुगेका एक युवकको आइतबार राति मृत्यु भएको छ ।

सुन्दरीजलमा पौडी खेल्ने क्रममा रामेछाप घर भएका तेन्जिङ तामाङको मृत्यु भएको हो । प्रहरीका अनुसार साथीहरुसँग समूहमा तेन्जिङ सुन्दरीजल पुगेका थिए ।

‘हिजो राति साढे ११ बजे हामीलाई खबर आएको थियो, खोजी गर्ने क्रममा पौडी खेलेको ठाउँबाट करिब दुई मिटर तल उनको शव भेटियो,’ महानगरीय प्रहरी प्रभाग सुन्दरीजलका प्रहरी नायव निरीक्षक अर्जुन गिरीले भने।

साउन महिनाभर बोलबम मनाउने गरिएकाले सुन्दरीजलमा भक्तजनको भीड हुने गरेको छ। तराई मूलका नेपाली र भारतीयहरु बोलबम मनाउन काठमाडौं आउने गरेका छन्।

साउन महिनाको अन्तिम सोमबारको अघिल्लो दिन भएकाले सुन्दरीजलमा आइतबार भक्तजनको ठूलो घुइँचो थियो।