मृगाैला तस्करलाई प्रहरीकाे साथ,घटनामा संलग्न चार अभियुक्त प्रहरीकाे नियन्त्रणमा

काठमाडाैं-काभ्रे वाङ्थलीका विष्णु खड्काले ख्याल-ख्यालमै भने -‘मोटरसाइकल चढ्नुपर्ने। मिर्गौला किन्ने कोही छैन ? भन है साथी हो।’

उनले यसो भनेपछि मिर्गौला तस्कर सम्पर्कमा आइहाले। तस्करसँग सम्पर्क गराउनेमध्ये एक थिए, प्रहरीकै सई योगेन्द्रराज थपलिया। उनी सशस्त्र प्रहरी १ नम्बर गणमा कार्यरत थिए। उनले मिर्गौला किन्ने एक व्यक्ति सम्पर्कमा रहेको बताएपछि कुरा गर्न खड्का राजी भए।

दिल्लीस्थित एक अस्पतालमा मिर्गौला झिक्ने तय भयो। त्यही बेला साउन ११ गते खड्कालाई उद्धार गरिएको महानगरीय प्रहरी परिसर प्रवक्ता डीएसपी होबिन्द्र बागटीले बताए।

महानगरीय प्रहरी वृत्त महाराजगन्जको टोलीले भारतीय प्रहरीको समन्वयमा उनलाई उद्धार गरेको हो। घटनामा संलग्न चार अभियुक्तलाई प्रहरीले नियन्त्रणमा लिएको छ।

महानगरीय प्रहरी वृत्त महाराजगन्जका प्रमुख डीएसपी फडिन्द्र प्रसाईंले मिर्गौला तस्करी गर्न खोजेको आरोपमा सइसहित चार जनालाई पक्राउ गरिएको बताए। खड्कालाई फकाएर दिल्ली पुर्‍याएको आरोपमा पक्राउ पर्नेमा थपलिया, गुरुङ, कार्की र नारायण पराजुली छन्। थपलियालाई जागिरबाट निलम्बन गरिएको छ।