विप्लवद्वारा प्रहरी सहायक निरीक्षक भैरव कुँवरलाई इन्काउन्टरको चेतावनी

काठमाडौँ – नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टीले राष्ट्रिय अनुसन्धान ब्यूरोमा कार्यरत प्रहरी सहायक निरीक्षक भैरव कुँवरलाई इन्काउन्टरको चेतावनी दिएको छ।

पार्टीका गतिविधि र नेता कार्यकताबारे सुराकी गरेको भन्दै कैलालीको बौनियाका कुँवरलाई सुराकी नरोके इन्काउन्टरको चेतावनी दिएको हो । विप्लव समूहका जनअदालत प्रमुख विकासद्वारा हस्ताक्षरित विज्ञप्तिमा कुँवरलाई २५ दिनभित्र उपस्थित हुन चेतावनी दिइएको छ।

कैलालीका एसपी दक्ष बस्नेतले विप्लव समूहद्वारा जारी गरिएको भनिएको विज्ञप्तिबारे अनुसन्धान भइरहेको बताए । ‘सञ्चारमाध्यममा समाचार प्रकाशित भएको छ, विज्ञप्ति सक्कली हो कि नक्कली हामी अनुसन्धान गरिरहेका छौँ’, उनले भने ।

प्रहरीले विप्लव समूहका नेता कार्यकर्तालाई खोजी खोजी पक्राउ गरिरहेका बेला विप्लव समूहले उल्टै इन्काउन्टरको चेतावनी दिएको हो ।

‘विप्लव समूहले प्रहरीविरुद्ध सांघातिक आक्रमणको कुनै नीति नरहेको बताइरहेका बेला यस्तो खाले विज्ञप्ति किन सार्वजनिक भएको हो हामी बुझ्दैछौँ’, एसपी बस्ननेतले भने ।