रवीन्द्र अधिकारीको उत्तराधिकारी भएर काम गर्नेछु : योगेश भट्टराई

काठमाडौं- नवनियुक्त नागरिक उड्डयन तथा पर्यटनमन्त्री योगेश भट्टराईले आफू तत्कालीन मन्त्री रवीन्द्र अधिकारीको उत्तराधिकारी भएर काम गर्ने बताएका छन्। राष्ट्रपतिबाट शपथग्रहण लिएलगत्तै मन्त्रालयकाे पदभार सम्हाल्दै उनले यस्तो बताएका हुन्। ‘रवीन्द्र अधिकारीको उत्तराधिकारी भएर आएको छु। यो भन्न मलाई हीनताबोध छैन। उनका काम पूरा गर्नेछु,’ उनले भने।  

उनले आफू नियोजित रुपमा नभई आकस्मिक रुपमा जिम्मेवारी लिन आएको बताए।  ‘प्रिप्लान होइन। प्रधानमन्त्री अपेक्षा पूरा गर्ने दायित्व लिएर आएको छु। कार्यालयका सहयोगीदेखि सचिवसम्म सबैलाई समान व्यवहार गर्नेछु।

आफूले सम्हालेको मन्त्रालयमा अब ‘आइस्योस् र गइस्योस्’जस्ता भाषा प्रयोग नगर्न आग्रह गरेका छन् ।

कामभन्दा चाकडी बढी गर्ने प्रवृत्तिका कारण सरकारी निकाय र मन्त्रालयले काम गर्न नसकेको भन्दै उनले कुराभन्दा बढी काम गरेर देखाउने प्रतिबद्धता जनाए ।

 भने, ‘मन्त्रालयमा आइस्योस् र गइस्योस् संस्कार हुँदैन, अब यस्ता संस्कारको अन्त्य गर्छु ।’

सचिवदेखि कार्यालय सहयोगीसम्मलाई समान व्यवहार हुने बताउँदै मन्त्री भट्टराईले कर्मचारी र दलका नेता कार्यकर्तालाई स्वागत र बधाईका नाममा विज्ञापनमा खर्च नगर्न समेत अनुरोध गरे । मन्त्री भएपछि बधाई दिन विज्ञापन गर्ने परम्परा रहेको भन्दै आफ्नो हकमा यस्तो कार्य नगरिदिन समेत उनको आग्रह थियो ।

त्यस्तै, आफूलाई बधाईभन्दा सुझाव र सल्लाह चाहिने भन्दै बधाईले थिचेर कामै गर्न नसक्ने अवस्था नबनाइदिन समेत उनले आग्रह गरे ।

मन्त्रालयका काममा पारदर्शिता र जवाफदेहिता अपनाउने प्रतिबद्धता जनाएका उनले गुनासो नआउने गरी काम गरेर देखाउने प्रतिबद्धता जनाएका छन् ।