निर्मला हत्याको एक वर्ष पूरा, कहिले न्याय पाउलिन् निर्मला?

काठमाडौं- कञ्चनपुर उल्टाखामकी १३ वर्षीया बालिका निर्मला पन्तको बलात्कारपछि हत्या भएको एक वर्ष पूरा भएको छ। गत वर्ष साउन १० गते साथीको घर गएकी निर्मलाको सोही दिन हत्या भएको थियो। तर उनको शव भोलिपल्ट मात्र उखुबारीमा फेला परेको थियो।

‘निर्मलाका निम्ति न्याय’को माग गर्दै सडकमा भएका धेरै संघर्ष भयो। प्रहरीले अनुसन्धान भइरहेको बताउँदै आएको छ। तर उनका हत्यारा को हुन् भन्ने यकिन भइसकेको छैन। प्रहरीले अनुसन्धान भइरहेको दोहोर्याभएको पनि एक वर्ष भएको छ।

यो बिचमा यो घटनाका सम्बन्धमा धेरै उतारचढाव आए। तर निर्मला र परिवारले न्याय पाउन भने बाँकी नै छ।

एक वर्षको अनुसन्धान प्रगति हेर्दा शून्य छ। घटनाको सरकारी तवरबाटै आधा दर्जनभन्दा बढी अनुसन्धान भएका थिए। अनुसन्धानकै क्रममा ८० भन्दा बढीको डीएनए परीक्षण र पाँच सय भन्दा बढी जनासंग सोधपुछ गरिएको छ।

घटनाका वरिपरि देखिने सयौ पात्रहरुका कल डिटेल पनि लिइयो । तर सुराकी पत्ता लागेन ।

उक्त बलात्कारी र हत्यारका अगाडि नेपाल सरकार, सुरक्षा टोली सबै कमजोर देखिएका छन्।

प्रहरीले एक वर्षको अवधिमा कसैलाई कार्वाहीको दायरामा ल्याउन नसकेको भन्दै आलोचना पनि भइरहेको छ।