संसद् अवरोध हटाउने सहमति, २ बजे बैठक बस्दै

काठमाडौं-प्रतिनिधि सभाको बैठक सुचारु गर्न सत्तारुढ र विपक्षी दल सहमत भएका छन् । सिंहदरबारस्थित सभामुख कृष्णबहादुर महराको कार्यकक्षमा भएको छलफलपछि संसद बैठक सञ्चालनमा सहमति जुटेको हो ।

सहमतिअनुसार प्रमुख प्रतिपक्षी नेपाली कांग्रेस र प्रतिपक्षी दल राजपाले बाढी, पहिरो, डुबान लगायतका बारेमा जरूरी सार्वजनिक महत्वको प्रस्ताव पेश गर्नेछन् ।

छलफलमा प्रमुख प्रतिपक्षी नेपाली कांग्रेसका प्रमुख सचेतक बालकृष्ण खाँडसहित पुष्पा भुसाल, मीनेन्द्र रिजाल र दिलेन्द्रप्रसाद बडु, पार्वती डिसी चौधरी, सत्ता पक्षका तर्फबाट नेकपा संसदीय दलका उपनेता सुवास नेम्बाङ, प्रमुख सचेतक देव गरूङ, राजपा अध्यक्ष मण्डलका संयोजक राजकिशोर यादव र लक्ष्मणलाल कर्ण लगायतको उपस्थिति रहेको थियो ।

सहमतिअनुसार दिउँसो १ बजेका लागि बोलाइएको बैठक साढे २ बजेका लागि सारिएको छ । बैठकका कार्यविधि तय गर्न १ बजे कार्यव्यवस्था परामर्श समितिको बैठक बोलाइएको छ ।