भीसीटीएस, ढुवानीमा भ्याट, प्यानको विरोध गरेका उद्योगी पछि हट्ने संकेत

काठमाडौं – भीसीटीएस, ढुवानीमा भ्याट, प्यानको विरोध गर्दै खारेजीको माग राखेर अर्थ मन्त्रालय पुगेका उद्योगी अर्थमन्त्री डा. युवराज खतिवडा देख्नेबित्तिकै गले । 

विगत केही दिनदेखि उद्योगीहरु भेइकल कन्साइन्मेट ट्रयाकिङ सिस्टम( भीसीटीएस), ढुवानीमा मूल्य अभिवृद्धि कर(भ्याट), कर्मचारीको अनिवार्य स्थायी लेखा नम्बर (प्यान) को व्यवस्था, डिजेलमा भ्याट खारेज लगायतका माग राखेर आन्दोलनमा उत्रिएका थिए । 

सरकारले ल्याएको कानुन अव्यावहारिक भएको निष्कर्ष निकाल्दै उद्योगीहरु आन्दोलनमा उत्रिएपछि वार्ताका लागि आइतबार अर्थ मन्त्रालयमा बोलाइएको थियो । 

जब उद्योगीहरु वार्ताका लागि हलमा छिरे, जहाँ अर्थमन्त्री खतिवडा उनीहरुलाई कुरेर बसेका थिए । अर्थमन्त्रीलाई देख्नेबित्तिकै उनीहरुको रुप मात्रै बिग्रिएन, आफू के माग लिएर अर्थमन्त्रीसमक्ष आएको समेत भुले ।

खासमा उनीहरु भीसीटीएस खारेजी, ढुवानीमा भ्याट लगाउन नहुने, कर्मचारीको अनिवार्य प्यान नम्बरको व्यवस्था खारेज हुनुपर्ने माग लिएर अर्थमन्त्रीसमक्ष वार्तामा पुगेका थिए । 

वार्ताका लागि हलमा बसेका अधिकांश उद्योगीले सरकारले ल्याएको व्यवस्था एकदमै राम्रो भएको भन्न पुगे । त्यति मात्रै होइन, उद्योगीले इन्टरनेट पहुँच सबै ठाउँमा नभएको भन्नसमेत भ्याए । जवाफमा अर्थमन्त्री खतिवडाले इन्टरनेट पहुँच नभएको स्थानमा इन्टरनेटको व्यवस्था गर्ने प्रतिबद्धता जनाए ।

‘मन्त्रालय पुग्नुअघि अर्थमन्त्रीविरुद्ध आक्रामक बनेका उद्योगी उहाँलाई देख्नेबित्तिकै सबैको होसहवास उड्यो,’ एक सहभागी उद्योगीले भने, ‘गरुडका अघि सर्पको जस्तो हालत हुन्छ, आज उद्योगीको पनि त्यस्तै हालत भयो ।’  

अर्थमन्त्रीले उद्योगीलाई एक–एक गरी समस्याका बारेमा सोध्दा उनीहरु सरकारले ल्याएको व्यवस्था एकदमै राम्रो रहेको समेत भन्न भ्याए । 

‘यदि उक्त व्यवस्था राम्रो नै थियो भने, अहिलेसम्म आन्दोलन किन गरेको ?’ एक उद्योगीले प्रश्न गरे, ‘बाहिर चर्को चर्को स्वरमा उफ्रिने, सम्बन्धित ठाउँमा पुगेपछि आफ्नो कुरा राख्न नसक्ने ।’ 

वार्तामा सहभागी हरेक उद्योगीले सरकारले ल्याएको व्यवस्थालाई गलत औंल्याउन सकेनन्, बरु इन्टरनेटको व्यवस्था सबै ठाउँमा मिलाउन आग्रह गर्न भ्याए । 

बरु अर्थमन्त्री आफैंले भने, ‘दैनिक ज्यालादारलाई अनिवार्य प्यानको व्यवस्था कठीन हो, यसलाई केही गर्न सकिन्छ ।’ तर, उद्योगीले कर्मचारीको अनिवार्य प्यान खारेजको कुरा गर्दै आएका थिए, त्यहाँ कसैले पनि बोलेनन् । 

वार्तामा नेपाल उद्योग वाणिज्य महासङ्घकी अध्यक्ष भवानी राणा, वरिष्ठ उपाध्यक्ष शेखर गोल्छा, निवर्तमान अध्यक्ष पशुपति मुरारका, उपाध्यक्षहरु चन्द्रप्रसाद ढकाल, किशोर प्रधान र उपाध्यक्ष उमेशलाल श्रेष्ठ, कार्यकारिणी सदस्य भरत आचार्य, अन्जन श्रेष्ठ, जय शिवाकोटीलगायत जनकपुर उद्योग वाािण्ज्य सङ्घका अध्यक्ष ललित साहलगायत जिल्ला नगरका उद्योगी व्यवसायी सहभागी थिए ।