नियमावलीमा मस्यौदा समितिका सदस्यहरुबीच गम्भीर मतभेद,कांग्रेस केन्द्रीय कार्य समिति बैठक सारियाे

काठमाडाैं-नेपाली कांग्रेसले तयार गरेको नियमावलीमा मस्यौदा समितिका सदस्यहरुबीच गम्भीर मतभेद भएपछि केन्द्रीय कार्य समिति बैठक पुन: सारिएको छ ।

कांग्रेस केन्द्रीय कार्य समिति बैठक ७ साउनको लागि बोलाइएकोमा मुख्यसचिव कृष्णप्रसाद पौडेलले ९ साउनका लागि बैठक सारेको जानकारी दिएका छन् ।

केन्द्रिय कार्य समितिको ३० असारमा बसेको बैठकले नियमावली मस्यौदा प्रतिवेदनलाई केन्द्रीय सदस्यहरुको सुझावलाई समेट्दै संशोधनसहित पारित गर्ने निर्णय गरेको थियो ।

तर, नियमावलीलाई सुझावसहित संशोधन गर्ने विषयलाई लिएर समितिका सदस्यबीच सहमति भएको छैन । पार्टी संस्थापन पक्षका सदस्यले नियमावलीलाई हुबहु पारित गर्नु पर्ने अडान लिएका छन् भने संस्थापनईतरका नेताहरुले शुभेच्छुक संगठनको सुझाव र आग्रह बमोजिम संशोधन गर्नु पर्ने अडान लिएका छन् ।

नेपाल ट्रेड युनियन कांग्रेस लगायतका १८ शुभेच्छुक संगठनले नियमावलीलाई संशोधन गरी शुभेच्छु्क संस्थामाथि नियन्त्रण गर्ने उदेश्यले राखिएका प्रावधानलाई हटाउन माग गरेका थिए । उनीहरुले आफूहरुको माग सुनुवाई नगरी पार्टी भातृ संस्थाको जस्तै व्यवहार गरे पार्टीसंगको संलग्नता त्याग गर्ने चेतावनी दिएका थिए ।

पार्टी संस्थापन पक्षले शुभेच्छुक संस्थाको मागप्रति सकारात्मक भएको जनाए पनि नियमावली मस्यौदा समितिका संयोजक रमेश लेखक भारततिर गएपछि समिति बैठक पनि प्रभावित भएको छ । नियमावलीमा समेट्नु पर्ने सुझावका विषयमा सहमति हुन बाँकी रहेको समिति सदस्य प्रदीप पौडेलले जनाए ।

नियमावलीमा मासिक लेवी उठाउने प्रावधानको अन्त्य गर्नुपर्ने, पार्टीको नीति, सिद्धान्त वा नेतृत्वविरुद्ध अभिव्यक्ति दिएमा अनुशासनको कारबाही गर्ने प्रावधान हटाउन सुझाव आएको थियो ।

तर, पार्टीको केन्द्रीय कार्यसमिति बैठकमा पार्टी सभापति शेरबहादुर देउवा पक्षधर नेताहरुले अनुशासनको कडा प्रावधान परिमार्जन गर्न पार्टी कार्यकर्ताले माग गरेका छन् ।

कांग्रेसको २२ असारमा बसेको केन्द्रीय कार्यसमिति बैठकमा महामन्त्री पूर्णबहादुर खड्काले नियमावली मस्यौदा समितिको प्रतिवेदनका साथै अन्य १३ वटा एजेण्डा पेस गरेका थिए ।

पार्टीका असन्तुष्ट नेताहरुले पार्टीको १४औं महाधिवेशनको लागि कार्यतालिका नल्याएसम्म बैठकमा नबस्ने अडान लिएसँगै सभापति देउवाले नियमावली पारित भएपछि महाधिवेशनको प्रक्रिया शुरु गर्ने जनाइएको थियो ।