अविरल वर्षा सम्भावना हट्याे,कस्तो छ आजको मौसम ?

काठमाडाैं-अविरल वर्षा गराउने मनसुनी न्यून चापीय रेखा आजदेखि नेपालबाट हटेकाले वर्षा कम हुने अनुमान मौसमविद्ले गरेका छन्।

मौसम पूर्वानुमान महाशाखाकी मौसमविद् विभूति पोखरेलले उक्त रेखा बिस्तारै दक्षिणतर्फ सर्दै आजदेखि भारत प्रवेश गरेकाले अब वर्षा कम हुने जानकारी दिएकी हुन्।

‘तर त्यसो भनेर वर्षा नै नहुने भने होइन,’ उनले भनिन्, ‘मनसुनका बेला हो, वर्षा त हुन्छ नै, तर अब पहिलेजस्तो अविरल वर्षा हुने सम्भावना छैन।’

न्यून चापीय रेखा अहिले भारतको उत्तर प्रदेशतिर रहेको मौसमविद् पोखरेलको भनाइ छ। तर त्यो रेखा तलमाथि सरिरहने भएकाले पुनः नेपाल आउने सम्भावना पनि छ।

उक्त रेखा नेपालमै रहेका बेला लगातार वर्षा भएको वा हुने मौसमविद् बताउँछन्। यसअघि न्यून चापीय रेखा नेपालमै थियो भने न्यून चापीय क्षेत्र पनि सक्रिय थियो।

यी दुवै प्रणाली सक्रिय रहँदा अविरल तथा भारी वर्षा भएको हो। जसका कारण देशमा बाढीपहिरो आएर ठूलो जनधन क्षति भयो।

अब भने बाढीपहिरोको जोखिम कम रहेको मौसमविद् पोखरेलको अनुमान छ।

कस्तो छ आजको मौसम ?

माैसम पूर्वानुमान महाशाखाका अनुसार हाल देशको पूर्वी भेगमा सामान्य बदली छ भने मध्य र पश्चिमी भेगमा आंशिकदेखि सामान्यसम्म बदली छ।

अहिले पूर्वी भेगका थोरै स्थानहमा वर्षा भइरहेकाे महाशाखाले जनाएकाे छ। 

आज पनि देशका केही स्थानमा वर्षा हुने सम्भावना छ। देशको १/२ स्थानमा भारी वर्षाकाे सम्भावना छ ।