अविरल वर्षाका कारण गएको बाढी पहिरोमा परेर ४१ पुरुष र २६ महिलाको मृत्यु, ३२ जना बेपत्ता, ३९ घाइते

काठमाडौँ-अविरल बर्षाका कारण देशका विभिन्न क्षेत्रमा गएको बाढी, पहिरो र डुबानमा परी हालसम्म ६७ जनाको मृत्यु भएको छ ।

प्रहरी प्रधान कार्यालयका अनुसार बाढी पहिरोमा परेर काठमाडौँमा ३ , मकवानपुरमा ६ , ललितपुर, रौतहट र भोजपुरमा ५/५ , ओखलढुङ्गा, सिरहा र सिन्धुलीमा ४/४ , खोटाङ, धनुषा र काभ्रेपलाञ्चोकमा ३/३ , झापा, उदयपुर, पर्सा, बारा, महोत्तरी, धादिङ र डोल्पामा २/२ तथा इलाम, पाँचथर, मोरङ, सुनसरी, रामेछाप, चितवन, पाल्पा र दाङमा १/१ गरी ६७ जनाको मृत्यु भएको हो । मृत्यु हुनेमध्ये २६ महिला र ४१ पुरुष छन् ।

बाढी तथा पहिरोमा परी ३२ जना बेपत्ता भएका छन् । बेपत्ता भएका १४ महिला र १८ पुरुषको खोजी भइरहेको प्रहरीले जनाएको छ । बाढी पहिरोमा परी डोल्पामा नौ, सिन्धुलीमा चार, इलाम र मोरङमा तीन/तीन, महोत्तरी र मकवानपुरमा दुई/दुई तथा काठमाडौँ, ललितपुर, झापा, सुनसरी, पर्सा, रौतहट, धनुषा, धादिङ र दाङमा एक÷एकजना बेपत्ता भएका छन् ।

विपदमा परेर ३९ घाइते भएका छन् । घाइतेको स्थानीय अस्पतालमा उपचार भइरहेको प्रहरीले जनाएको छ । प्रहरीले प्रभावित जिल्लाबाट एक हजार ४ सय ४५ जनालाई सकुशल उद्धार गरी सुरक्षित स्थानमा स्थानान्तरण गरेको छ ।