मोस्ट वान्टेड व्यक्ति कृषिमन्त्री चक्रपाणि खनालसँगै एउटै मञ्चमा

काठमाडौं-आठ जनाको जघन्य हत्या गरेर फरार रहँदै आएका कपिलवस्तुका कुख्यात अपराधी नसिम खान पक्राउ परेका छन् ।

उनी पछिल्लो समय २०७४ फागुन ३ मा ५ वर्षका मोहम्मद रहमानको अपहरणपछि हत्या गरी फरार रहेका थिए । यी ५ वर्षीय बालक मायादेवी–४ का वडा अध्यक्ष फतेह मोहम्मदका छोरा हुन् । फरार रहेका खानलाई केन्द्रीय अनुसन्धान ब्युरोको टोलीले पक्राउ गरेको हो ।

नसीम बिरूद्व २०६३ यता सातवटा अन्य हत्याका मुद्दा दर्ता रहेका छन् । नसिम कपिलवस्तुका मोस्ट वान्टेड हुन् । उनीविरूद्व जिल्ला प्रहरी कार्यालय कपिलवस्तुमा हत्या, अपहरण र डकैतीका एक दर्जन मुद्दा दर्ता छन् । उनी पैसा र पावरका आडमा अर्धभूमिगत बस्दै आएका थिए ।

नसिम खान पछिल्लो समय गत ३ पुसमा कपिलवस्तुको मायादेवी– २ अभिरावमा आयोजित मुसायरा वाचन एवं कवि सम्मेलनमा कृषिमन्त्री चक्रपाणि खनाल र प्रमुख जिल्ला अधिकारी अर्जुन पोखरेलसँगै देखिएका थिए । यद्यपि उनी त्यहाँ पक्राउ परेनन् ।

प्रहरीको फरार सूचीमा रहेका खानमाथि ७ वटा कर्तव्य ज्यान र एउटा डाँका मुद्दा दर्ता छन् । उनीमाथिका कर्तव्य ज्यानका ६ वटा र एउटा डाँका मुद्दा सर्वोच्च अदालत, उच्च अदालत र जिल्ला अदालतमा विचाराधीन छन् भने एउटा मुद्दा जिल्ला प्रहरी कार्यालयमा छ ।