देउवा विराेधी खेमा पून एक ठाँउमा, संस्थापन इतरका शीर्ष नेताकाे बैठक

काँग्रेस केन्द्रीय कार्यसमितिको बैठक नजिकिँदै गर्दा संस्थापन इतरका नेताहरु आन्तरिक छलफलमा जुटेका छन् ।

आफ्नो समूहको साझा रणनीति तयार गर्ने उद्देश्यका साथ नेताहरु आन्तरिक छलफलमा जुटेका हुन् ।

मंगलबार साँझ काँग्रेस वरिष्ठ नेता रामचन्द्र पौडेल, महामन्त्री डा शशांक कोइराला, नेताहरु कृष्ण प्रसाद सिटौला, प्रकाशमान सिंह, अर्जुन नरसिंह केसी र सुजाता कोइरालाबीच छलफल भएको छ ।
काँग्रेस नुवाकोटका जिल्ला सभापति जगदीश्वरनरसिंह केसीको गोंगबुस्थित निवासमा भएको छलफलमा समसामयिक राजनीतिक अवस्था, २२ गते बस्ने पार्टीको केन्द्रीय कार्यसमितिको बैठक र विधानका विषयमा केन्द्रीत रहेर विचारविमर्श भएको थियो ।

यस्तै प्रदेशदेखि वडासम्मको नेतृत्व निर्वाचन पद्धतिमार्फत चयन गरिनुपर्ने, समयमै अधिवेशन गर्नका लागि नेतृत्वले पहल गर्नुपर्ने, नेविसंघ लगायत भातृ र शुभेच्छुक संस्थाको पनि तदर्थ समिति नभई निर्वाचनबाटै नेतृत्व चयन गरिनुपर्नेमा नेताहरुबीच समझदारी बनेको छ । यही विषयलाई केन्द्रीय समितिमा जोडतोडले उठाउने बारे पनि नेताहरुबीच समझदारी बनेको एक नेताले बताए ।