किशोरीको हत्यामा सम्लग्नलाई थुनामा राख्न आदेश

पाँचथर-पाँचथर जिल्ला अदालतले १५ वर्षीया किशोरीको हत्यामा सम्लग्नहरुलाई पुर्पक्षका लागि थुनामा राख्ने आदेश दिएको छ ।

जिल्ला न्यायाधीश मनोजकुमार केसीको इजलासले पाँचथरको हिलिहाङ गाँउपालिका वडा नं. ४ पञ्चमीकी १५ वर्षीया किशोरी शितल योङहाङको हत्यामा सम्लग्नहरुलाई पुर्पक्षका लागि थुनामा राख्ने आदेश दिएको हो ।

गत बैशाक २९ गते योङहाङको घाँटी रेटेर हत्या गर्ने कार्यमा सम्लग्न रहेको आरोप लागेका पाँचथरको फाल्गुनन्द गाँउपालिका वडा नं. २ का पदम गोले तामाङ, भगीरथ बाँस्तोला र कर्ण तामाङलाई पुर्पक्षका लागि थुनामा राख्ने आदेश भएको पाँचथर जिल्ला अदालतले जनाएको छ ।

प्रत्यक्ष सम्लग्न नभएपनि पदम र भगीरथलाई पदमकै काका कर्ण तामाङले हत्यामा सहयोग पु¥याएको प्रहरी अनुसन्धानबाट खुलेको छ । गत आइतबारदेखि जिल्ला अदालतमा चलेको बयान सकिएसँगै अदालतले विहीवार पुर्पक्षका लागि थुनामा राख्ने आदेश दिएको हो । पाँचथर प्रहरीका अनुशार उनीहरुलाई विहीवार नै पाँचथर कारागार चलान गरिएको छ ।

हिलिहाङ गाँउपालिका वडा नं. ४ स्थित सिद्ध माध्यमिक विद्यालयमा कक्षा १० मा अध्ययनरत योङहाङको उनका पूर्व प्रेमी पदम तामाङले बाँस्तोलाको सहयोगमा घाँटी रेटेर हत्या गरेको प्रहरी अनुसन्धानको निश्कर्ष छ । तामाङसँग मोवाइल सेट र सीमकार्ड साटेकी योङहाङलाई उक्त सामग्री फिर्ता गर्न एकान्तमा बोलाई उनीहरुले हत्या गरेका थिए । आफूबाट टाढिएर अर्कै केटासँग कुरा गर्न थालेको आशंकामा तामाङले शितलको हत्या गरेको स्वीकार गरेको पाँचथर प्रहरीको भनाई छ ।

हत्यामा सम्लग्न बाँस्तोला बैशाक ३० गते फिदिमबाट पक्राउ परेका थिए । हत्यामा सहयोग पु¥याउने कर्ण घटना भएको नौ दिन पछि फिदिमबाटै पक्राउ परेका थिए ।

कर्णले हत्यामा सम्लग्न भएका दुई जनालाई गाडी भाडा दिएर सहयोग गरेको प्रहरीले अदालतमा पेश गरेको अभियोगपत्रमा उल्लेख छ । हत्याका मुख्य योजनाकार पदम भने २१ दिनसम्म फरार रहेका थिए । उनलाई प्रहरीले जेठ १८ गते झापाको दमकबाट पक्राउ गरेको थियो ।