ओली सरकार निरंकुस – देउवा

काठमाडौं-नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओली निरंकुश राजा जस्तै बन्न थालेको आरोप लगाएका छन् |

सभापति देउबाले विगतमा राजाले वाक स्वतन्त्रता, प्रेस स्वतन्त्रता खोसे जस्तै प्रधानमन्त्री ओलीले गर्न खोजेको बताए । रुपन्देही कांग्रेसको जिल्ला सम्मेलन उद्घाटन गर्दै देउवाले भने ‘जनताका अधिकार खोस्ने र प्रजातन्त्रसँग हिँड्न नखोेजेपछि राजा (ज्ञानेन्द्र)लाई पनि हटाएका हौं, त्यत्तिकै हटाएका होइन |’

सरकारले मिडिया काउन्सील विधेयक ल्याएर वाक तथा अभिव्यक्ति र प्रेस स्वतन्त्रता खोस्न खोजेके उनले बताए । ‘२००७ सालदेखि हामी लडेको वाक स्वतन्त्रता, प्रेस स्वतन्त्रताका लागि हो । अहिले सरकारले विधेयक ल्याएर स्वतन्त्रतामा बन्देज लगाउन खोज्दैछ’ देउवाले भने, ‘हामी संसद चल्न दिन्नौंं, विधेयक कुनै हालतमा पास हुन दिन्नौं ।’

सरकारले स्वतन्त्र न्यायपालिका र मानवअधिकार आयोगमाथि पनि हस्तक्षेप गरिरहेको उनले बताए । ‘ओली सरकार पञ्चायत भन्दा पनि तल्लो स्तरमा ओर्लेर निरंकुशता र मनपरी लाद्न खोज्दैछ’ पूर्वप्रधानमन्त्री समेत रहेका देउवाले भने, ‘सरकारविरुद्ध लड्नुपर्ने अवस्था छ, आन्दोलनका लागि तयार हुनुस् ।’

विपक्षी दलका नेता देउवाले सरकारले ल्याएको वजेट कार्यकर्ता पाल्ने खालको मात्र भएको टिप्पणी गरे । ‘विदेशबाट आएको अनुदान र ऋणले कार्यकर्तालाई पाल्न पाइन्छ ?’ देउवाले भनेका छन्, ‘यो कुनै हालतमा हुन दिन्नौं ।’