उपत्यकाका पोखरी र ढुंगेधाराको संरक्षण हुने

काठमाडौं–खानेपानी मन्त्री बिना मगरले उपत्यकामा रहेका ताल तलैया, पोखरी र ढुंगेधाराको संरक्षण, सम्बर्द्धन गर्ने बताएकी छिन |

शुक्रबार उपत्यका भित्रका पुराना ढुङ्गे धारा तथा पोखरीहरुको लगत–नक्साङकन सम्बन्धी पुस्तकको बिमोचन गर्दै मन्त्री मगरले ऐतिहासिक सम्पदाको रुपमा रहेका काठमाडौं उपत्यकाका पोखरी र ढुंगेधाराको संरक्षण र सम्बर्द्धन आफ्नो प्राथमिकतामा रहेको बताएकी हुन् ।

कार्यक्रममा मन्त्री मगरले आधुनिकताले हाम्रो प्राचीन सभ्यता झल्काउने कलात्मक ढुंगेधारा र पोखरीहरु मासिदै गैरहेको बताइन् ।

अव्यवस्थित शहरीकरणका कारण हाम्रा ऐतिहासिक महत्वका कला, संस्कृति लोप भैरहेको बताउंदै मन्त्री मगरले बाँकी रहेका सम्पदाहरुको उचित संरक्षण हुन नसके मासिएर जाने बताइन |

ढुंगेधारा र पोखरीको संरक्षण र सौन्दर्यीकरण गरेर पर्यटकहरुलाई समेत आकर्षित गर्न सकिने मन्त्री मगरको भनाइ थियो।

काठमाडौं उपत्यका भित्र रहेका ढुंगेधारा र पोखरीहरुको बारेमा लगत तथ्यांक संकलन गरि पहिलोपटक पुस्तक तयार भएको हो ।