उत्तर कोरियाका उच्च अधिकारीको भ्रमण प्रभावकारी हुने दक्षिण कोरियाको विश्वास

काठमाडौं । उत्तर कोरियाका राज्य प्रमुख किम योङ नाम शीतकालीन ओलम्पिकका लागि पहिलोपटक दक्षिण कोरिया भ्रमणमा आउने भएका छन् ।
बीबीसीले जनाएअनुसार उत्तर कोरियाबाट दक्षिण भ्रमणमा आउने उनी अहिलेसम्मकै सबैभन्दा उच्च अधिकारी रहेको बताइएको छ । नाम शुक्रबारको समारोहमा उपस्थित हुने खबर उत्तर कोरियाले नै सार्वजनिक गराएको बताइएको छ ।

ओलम्पिकको उद्घघाटन समारोहमा उत्तर कोरिया र दक्षिण कोरियाले एउटै झण्डामुनि मार्च गर्ने तय भएको छ । यस कार्यक्रमले दुई देशबीच शान्ति र एकताको संकेत गराएको भएपनि उत्तर कोरियाको आणविक कार्यक्रममा भने यसले कुनै असर नपार्ने विश्वविद्हरुको भनाइ छ ।

तरपनि उनको आगमनले दक्षिण कोरियामा भने विशेष महत्व बोकेको बताइएको छ । उनको भ्रमणले उत्तर कोरिया दक्षिणसँग मेलमिलापका लागि साँच्चै तयार रहेको पुष्टि हुने दक्षिणका अधिकारीहरुको भनाइ छ । त्यसकारण दक्षिण कोरियाले पनि यस अवसरको पूरा फाइदा उठाउँदै उनीसँग उच्च स्तरीय वार्ता गर्ने योनह्याप समाचार एजेन्सीले बताएको हो ।

किम योङ तीन दिनका लागि दक्षिण कोरियामा बस्ने र आफ्ना देशका २२ खेलाडीको नेतृत्व गर्ने बताइएको छ । ९० वर्षीय किम योङ नामले आफ्नो जीवनभर उत्तर कोरियाका तीन शाषकका लागि काम गरेका छन् ।

उत्तर कोरियामा उनी आफ्नो काममा अत्यन्तै वफादार र समर्पित व्यक्तित्वका रुपमा चर्चित छन् ।