उत्तर कोरियालाई अमेरिकी उपराष्ट्रपतिको चेतावनी: ट्रम्पको धैर्यको परीक्षा नलेऊ

सोल – एसिया भ्रमणमा रहेका अमेरिकी उपराष्ट्रपति माइक पेन्सले उत्तर कोरियालाई ट्रम्पको संकल्पको परीक्षा नलिन चेतावनी दिएका छन्। उनले अमेरिका र दक्षिण कोरियाले उत्तर कोरियाको थप आणविक र क्षेप्यास्त्र परीक्षण नसहने बताएका छन्।

दक्षिण कोरियाका कार्यवाहक राष्ट्रपति ह्वाङ क्यो आनसँगै बोल्दै उपराष्ट्रपति पेन्सले उत्तर कोरियाप्रति ‘सबै विकल्प खुला रहेको’ बताए। साथै उनले आफ्ना मित्र राष्ट्रहरुप्रतिको प्रतिबद्धता पनि दोहो¥याए।

‘गत दुई सातामा मात्रै हाम्रा नयाँ राष्ट्रपतिले सिरिया र अफगानिस्तानमा चालेको कदमबाट उहाँको शक्ति र संकल्पलाई सारा विश्वले देखिसकेको छ,’ पेन्सले भने, ‘राष्ट्रपति ट्रम्पले यस क्षेत्रमा अमेरिका र मित्र राष्ट्रहरुको धैर्य गुम्न लागेको स्पष्ट पारिसक्नु भएको छ, त्यसैले हामी परिवर्तन देख्न चाहन्छौँ।’

पेन्सले उत्तर कोरियाको सीमामा रहेको सैन्य अड्डाको भ्रमण पनि गरेका थिए। यसअघि उत्तर कोरियाले गरेको एक क्षेप्यास्त्र परीक्षण असफल भएको समाचार बाहिर आएको थियो।