कोरियाली प्रायद्वीपमा विवाद चुलिदै गर्दा अमेरिकी उपराष्ट्रपति दक्षिण कोरियामा

सोल – अमेरिकाका उपराष्ट्रपति माइक पेन्स आइतबार दक्षिण कोरिया पुगेका छन् । एसियाको पहिलो भ्रमणको रुपमा उनले आइतबार दक्षिण कोरिया पुगेका हुन् |

भ्रमणका क्रममा अमेरिकी उपराष्ट्रपति पेन्सले दक्षिण कोरियाली उच्च व्यक्तित्वसँग उत्तर कोरियाको क्षेप्यास्त्र तथा परमाणु कार्यक्रमबारे छलफल गर्ने बताइएको छ ।

उत्तर कोरियाले असफल व्यालिस्टिक क्षेप्यास्त्र परीक्षण गरेकै बेला उनले दक्षिण कोरियाको भ्रमण गरेका हुन् । उत्तर कोरियाले पूर्वी सिन्पो सहरबाट सो क्षेप्यास्त्र परीक्षण गरेको थियो ।

अमेरिका र उत्तर कोरियाको सम्बन्ध पछिल्लो समयमा थप नराम्रो हँदै गइरहेको छ ।उनले दक्षिण कोरियाको राष्ट्रपतिको समेत जिम्मेबारी सम्हाल्नु भएका प्रधानमन्त्री ह्वाङ क्योहनसँग भेटबार्ता गर्ने कार्यक्रम रहेको छ ।

तत्कालिन राष्ट्रपति पार्क गेउन हाइ भ्रष्टाचार गरेको महाअभियोग लागेर पदमुक्त भएकाले प्रधानमन्त्री क्योहनले राष्ट्रपतिको समेत जिम्मेबारी पाएका हुन् ।
उप राष्ट्रपति पेन्सले दक्षिण कोरियाको संसदका सभामुख चुङ से क्युनका साथै अन्य शिर्ष व्यक्तित्व तथा व्यवसायीहरुलाई पनि भेट्ने भ्रमण तालिका रहेको छ ।