दक्षिण कोरियाली सरकारको स्वीकृति बिना कार्यक्रम गरे, ३ बर्ष जेल र २ करोड जरिवाना

सोल- दक्षिण कोरियामा नेपाली प्रवेश गरेको तीन दशक हुनै लाग्यो । यो अवधिमा सर्यौ कार्यक्रमहरु आयोजना गरिए । सहयोगी र परोपकारी भावनाले प्रेरित भएका त्यस्ता कार्यक्रमहरु कोरियाली कानुनको हिसाबले अवैधानिक थिए भन्ने कुराको जानकारी हालै मात्र थाहा भएको छ ।

सोल सदेमुनस्थित प्रहरी कार्यलयले प्रवासी मजदूर युनियनका अध्यक्ष उदय राईलाई बोलाएर कोरिया सरकारको सम्बन्धित निकायसंग स्वीकृति नलिई नेपाली समुदायले संस्कृतिक कार्यक्रम, चिठ्ठा कार्यक्रम,चन्दा संकलन र राजनीतिक तथा धार्मिक गतिबिधि गरे अन्र्तराष्ट्रिय ऐनका आधारमा कडा कार्वाहि गरिने अवगत गराएको हो ।

गैर कानुनी रुपमा बिभिन्न गतिविधि गरेको उजुर पर्यो भने आयोजकलाई कम्तिमा ३ बर्ष जेल सजांय र कम्तिमा २ करोड वन (करिब २० लाख रुपैयां) जरिवाना हुने अन्र्तराष्ट्रिय अपराध अनुसन्धान ऐन रहेको छ ।

स्वीकृति नलिई कार्यक्रम गर्ने, स्थान उपलब्ध गराउने, टिकट बिक्रि बितरण गर्ने, पोस्टर सौजन्य गर्नेलाई समेत कडा कार्वाहि हुने कोरियन प्रहरीको भनाई उदृत गर्दै अध्यक्ष राईले बताए । उनका अनुसार आर्थिक करोबार गरिएको रकम जफत गर्ने र स्पन्सर दिने कोरियन नागरिकलाई समेत कार्वाहि गरिनेछ ।

कोरियामा ४० हजार नेपाली रहेको अनुमान गरिएको छ । यी मध्ये ईपिएसबाट रोजगारी गर्न गएका कामदारहरु धेरै छन् । उनीहरु मध्ये अधिकांश जातिय, क्षेत्रीय, धार्मिक,राजनीतिक दलसंग आबद्ध हुने गरेका छन् । कोरियामा बिभिन्न उद्धेश्य लिएर खोलिएका १ सय ५० जतिस संस्थाहरु कृयाशील छन् । राष्ट्रियस्तरका हरेका राजनीतिक दलले मुख्य शहरहरुलाई आधार मानेर संगठन बिस्तार गरेका छन् ।

नेपाली कामदारहरुको गतिविधि सरकारले सुक्ष्म रुपमा अध्ययन गरिरहेको कोरियाली अध्यागमन बिभागमा कार्यरत एक नेपाली कर्मचारीले जानकारी दिए ।

ती कर्मचारीका अनुसार केरियामा नेपाली समुदायले धेरै गतिविधि अनुमति नलिई गर्ने गरेका छन् । उनीहरुको सबै गतिविधि कोरियन कानुनका हिसाबले अवैधानिक मनिने गरेको छ ।

सोलको एक राजनीतिक कार्यक्रममा एमाले अध्यक्ष केपी ओलीको पुत्ला दहन गर्ने नेपालीहरु प्रहरीको निगरानीमा रहेका उनले जानकारी दिए । राजनीतिक गतिविधिमा संलग्न भएकै आधारमा केहि महिना अघि एक जना बिद्यार्थीका आफन्तलाई प्रहरीले पक्राउ गरि नेपाल पठाएको थियो ।

प्रहरीले राईलाई किन बोलायो ?

उदय राई प्रवासी मजदूर युनियनका अध्यक्ष हुन् । यूनियनमा १५ देशका मजदूर सदस्य छन् । संस्थाको कोष बढाउन मे १ मा खोल्ने गरि चिठ्ठा कार्यक्रम आयोजना गर्ने तयारी थियो । चिठ्ठा बिक्रिका लागि सोलमा रहेका नेपाली रेस्टुरेन्टमा पुर्याइएको थियो । यसको प्रचारप्रसार पनि ब्यापक भयो । यो बिषयलाई लिएर एक जना नेपालीले प्रहरीललाई उजुर गर्यो ।

प्रहरीले पक्राउ पुर्जि लिएर राईको घरमा खानतलासी गर्न आयो । प्रहरीले तुङदेमुनमा रहेको पशुपति मार्टमा पनि खानतलासी गर्यो र उप्रान्त यस्तो चिठ्ठा टिकट नलिन चेतवनी दियो । राईलाई दोहोर्याएर गैर कानुनी काम नगर्न र आवश्यता परेका बेला फेरि उपस्थित हुने गरि छोडिएको छ । प्रहरीको चेतावनी पश्चात चिठ्ठाको रकम सबैलाई फिर्ता दिइएको युनियनका अधिकारी मधुसुदन ओझाले बताए ।

प्रभाव

कोरियन प्रहरीको यो कदमले बिभिन्न अवसरमा जातिय, क्षेत्रीय, राजनैतीक र सास्कृतिक संघ संस्थाले आयोजना गर्ने कार्यक्रमहरु प्रभावित हुने देखिएको छ । कार्यक्रमका लागि स्वीकृति लिएपछि प्रहरीले सुरक्षा जिम्मा समेत लिनुपर्ने भएकाले पनि सम्बन्धित निकायबाट स्वीकृति पाउन गाह्रो हुने एक मजदूर अधिकारी बताउन्छन् ।

त्यहां रहेका नेपालीहरुले हरेक बर्ष बिभिन्न कार्यक्रम आयोजना गरेर नेपालमा सहयोग पुर्याउदै आएका छन् । उनीहरुले अभियान संचालन गरेरै भूकम्प, आग्लागी, बाढि, पहिरो पीडित र आर्थिक आभावका कारण उपचार नपाएकालाई सहयोग गर्दै आएका छन् । यो कदमले नेपाली कलाकारलाई पनि प्रभाव पार्ने देखिएको छ । कोरियन पर्व सलनाल, छुसक जस्ता कोरियन र दशैं, तिहार जस्ता नेपाली पर्वहरुमा सयौं नेपाली कलाकार आकार्षक पाारिश्रमिक लिएर कोरिया जाने गरेका छन् ।