१८ बर्ष अघि हत्या गरी फरार रहेका अधिकारी साउदी अरबबाट पक्राउ

काठमाडौं- कास्की सिद्ध–७ का नारायण बहादुर अधिकारी प्रहरीले साउदी अरबबाट पक्राउ गरेको छ ।

सितादेवी थापा सुयल समेतको जाहेरीले बादी नेपाल सरकार प्रतिवादी अधिकारीलाई कर्तव्यज्यान मुद्धामा कास्की जिल्ला अदालतको २०५७ बैशाख १९ गतेको फैसलाले सर्वश्व सहित जन्म कैदको सजाय हुने गरी फैसला भएको थियो ।

नेपाली सेनामा कार्यरत अधिकारी र वैदेशिक रोजगारको लागि साउदी अरबमा गएका जिवनबहादुर अधिकारी एकै ब्यक्ति भएको तथ्यको आधारमा कास्की जिल्ला अदालतबाट २०७३ जेठ १६ गते जारी भएको पक्राउ पूर्जि अनुसार निजलाई साउदी अरबबाट पक्राउ गरी २०७३ माघ २९ गते नेपाल ल्याईएको हो ।

अधिकारीले २०५५ कार्तिक ११ गते जिल्ला कास्की सिद्ध –७ बस्ने शिबराज थापा सुयललाई खुर्पा प्रहार गरी हत्या गरेका थिए ।

सोही घटनाका सम्बन्धमा सेनाको हिरासतमा रहेका बखत २०५६फागुन २७ गते भागी फरार भएका प्रतिबादी नारायण अधिकारीले आफ्नो नाम परिवर्तन गरी जिवनबहादुर अधिकारीको नाममा वैदेशिक रोजगारीको लागि साउदी अरब गएको जानकारीका आधारमा केन्द्रीय अनुसन्धान ब्यूरोको पहलमा २०७३ जेठ २४ गते निजको नामको रेड कर्नर नोटीस जारी भएकोमा साउदी अरब प्रहरीको सहयोगमा सोही मुलुकबाट प्रहरीले पक्राउ गरेको थियो ।

निजलाई फागुन १ गते काठमाडौं जिल्ला अदालतमा पेश गरेकोमा अदालतको आदेशले कैद भुक्तानको लागि केन्द्रिय कारागार कार्यालय सुन्धारामा पठाईएको छ ।