मीरा राई बनिन् नेशनल ज्योग्राफिकको ‘वर्षकै साहसी’

काठमाडौं – नेशनल ज्योग्राफिकले असाधारण व्यक्तिलाई प्रदान गर्ने ‘वर्षकै साहसी’ अवार्डको बाजी यसपटक नेपाली चेली मीरा राईले मारेकी छिन् ।

असाधारण १० सहासी महिलासँगै मनोनित भएकी राइले सर्वाधिक भोट प्राप्त गरी उक्त उपाधि (एड्भेन्चर अफ द इयर) आफ्नो पोल्टामा पार्न सफल भएकी हुन् ।

भोजपुरमा जन्मिएकी उनले एक महिलाका लागि नेपाली समाजले तोक्ने मूल्य मान्यताभन्दा फरक गर्ने सोचिन् । यहि सोचाइले आज उनलाई अन्तर्राष्ट्रिय उपाधि प्राप्त गर्न सहयोग गरेको उनले बताइन् ।१४ वर्षको उमेरमा माओवादीमा प्रवेश गरेकी उनी शान्ति प्रक्रिया पछि भएको सेना समायोजनमा अयोग्य ठहरिएकी थिइन् ।

अरुलाई सशक्त बनाउने आफ्नो अभियान भर्खरै सुरु भएको मीरा बताउँछिन् । ‘प्रतिस्पर्धी खेलाडीका लागि नेपालमा अथाह क्षमता छ यसका लागि काठमाडौंमा अल्ट्रा म्याराथन रेसको आयोजना हुन लागेको छ,’ मीराले बताइन् ।

‘मैले आफूले सोचेको जस्तो गर्न सकें किनभने सबैले मलाई विश्वास गर्नुभयो र साथ दिनुभयो। त्यसकारण म यी सबै कुरा नया आउने पीढिका लागि हस्तान्तरण गर्न चाहन्छु जसरी मैले अरुबाट पाएँ ।’ राइले भनिन् । नेपालमा हाम्रो निकै चर्चित भनाई छ, ‘खान पुगोस् दिन पुगोस् ।’