भ्रष्टाचार गर्नेमा नेपाललाई २९ अंक

काठमाडौं-नेपाल दक्षिण एसियाकै तेस्रो भ्रष्ट मुलुक बनेको छ | ट्रान्सपरेन्सी इन्टरनेशनलले बुधबार सार्वजनिक गरेको सूचकांकमा नेपाल २९ अंक पाएर १३१ औं स्थानमा छ । यो अध्ययनमा १७६ देशलाई समावेश गरिएको थियो । गत वर्ष १६८ देशलाई समावेश गरिएको सूचकांकमा नेपाल २७ अंकसहित १३० औं स्थानमा थियो ।

नेपालले यो वर्ष पाएको अघिल्लो वर्षको अंक २ बढी हुनुले भ्रष्टचारको अवधारणामा सामान्य सुधार आएको हो कि भन्ने देखिएको छ । तर, नेपालले पाएको अंकमा भएको थोरै फेरबदलले भ्रष्टाचारमा कमी आएको भन्न नमिल्ने ट्रान्सपरेन्सी इन्टरनेशनल नेपालले जनाएको छ ।ज्यादा भ्रष्टाचार हुने मुलुकहरुको सूचीमा पर्ने नेपालको स्थिति अघिल्लो वर्षको तुलनामा केही सुध्रिएको छ । तर, नेपालको स्थान भने सूचीमा एक अंकले पछाडि परेको छ ।

दक्षिण एसियाली देशहरुमा भुटान सबैभन्दा कम भ्रष्ट मुलुक बनेको छ । ६५ अंकसहित भुटान भ्रष्टाचार अवधारणा सूचकांकको २७ औं स्थानमा छ । भारत ४० अंकसहित ७९ औ, माल्दिभ्स र श्रीलंका ९५ औं स्थानमा छन् । पाकिस्तान नेपाल भन्दा अगाडि छ, ३२ अंक पाएको पाकिस्तान ११६ औं स्थानमा छ ।

सीपीआई मापन गरिने अन्य सूचकांकमा खासै ठूलो फेरबदल नदेखिए पनि ‘व्यापार व्यवसायमा हुने भ्रष्टाचारको प्रभाव’को अंकमा नेपालले छवि विगारेको छ । प्रत्यक्ष सर्वेक्षणमा संलग्न नहुने ट्रान्सपरेन्सी इन्टरनेशनलले विभिन्न अन्तर्राष्ट्रिय संस्थाहरुले गरेको सर्वेक्षणका आधारमा भ्रष्टाचार अवधारणा सूचकांक(सीपीआई) तयार गर्छ ।