प्रधानमन्त्री प्रचण्डले भने -अपराध रोक्न सहकार्य चाहिन्छ

काठमाडौं- प्रधानमन्त्री पुष्पकमल दाहालले संगठित अपराध नियन्त्रणको लागि एसियाका देशहरुबीच सामूहिक सहकार्य आवश्यक रहेको बताएका छन् ।

काठमाडौंमा बुधबारदेखि सुरु अन्तर्राष्ट्रिय प्रहरी अपराध संगठन (इन्टरपोल)को २३ औं एसियन रिजनल कन्फरेन्सको उद्‌घाटनपछि उनले उक्त कुरा भनेका हुन् । प्रधानमन्त्री दाहालले भने, ‘कुनै पनि एक देशले मात्र चाहेर संगठित अपराध नियन्त्रण हुँदैन । यस्तो सीमा बाहिर फैलिएको अपराध नियन्त्रण गर्न सामूहिक सहकार्य चाहिन्छ ।’ क्षेत्रीय सहकार्य जरुरी रहेकोमा जोड दिँदै उनले कानुन र विधिको पालना गराउनु दक्षिण एसियाको साझा समस्या रहेको बताए ।

‘सुरक्षा अवस्थामा नयाँ चुनौती र खतरा बढिरहेका छन्’ प्रधानमन्त्री दाहालले भने, ‘देश बाहिर बसेर सामाजिक सञ्जालमार्फत अफवाह र घृणा फैलाउने काम भइरहेको छ । यो आधुनिक प्रविधिको दुरुपयोग हो ।’

कार्यक्रममा नेपाल प्रहरीका आईजीपी उपेन्द्रकान्त अर्यालले विज्ञान प्रविधिले अपराधको शैली र तरिका फेरिएको भन्दै यसको नियन्त्रण चुनौतीपूर्ण रहेको बताए । उनले इन्टरपोलजस्ता संगठित प्रयासले मात्र यी समस्या समाधान गर्न सहयोग पुर्‍याउने बताए ।

इन्टरपोलका महासचिव जुरगेन स्टकले आतंकवाद दक्षिण एसियाको साझा समस्या भन्दै यसविरुद्ध लड्न संगठित सहकार्य चाहिने बताए । ‘भर्चुअल प्रोपगाण्डा पनि अहिलेको विश्वको समस्या हो’ उनले भने, ‘आतंकवादीहरुले नै सामाजिक सञ्जालको दुरुपयोग गरिरहेका छन् । यससँग लड्न विश्वव्यापी रुपमा सूचना आदानप्रदान र सहकार्य गर्नुपर्छ । डिजिटल अनसन्धान अहिलेको चुनौती हो ।’

सम्मेलनमा आईजीपी अर्यालले मानव तस्करको चुनौती र अवस्थाबारे नेपालको तर्फबाट कार्यपत्र प्रस्तुत गर्ने कार्यक्रम छ । तीन दिनसम्म चल्ने सम्मेलनमा ५० भन्दा बढी देशका प्रहरी प्रतिनिधि सहभागी छन् ।