कोरियामा सम्झिए  भानुभक्त  

सोल- अन्तर्राष्ट्रिय नेपाली साहित्य समाज कोरिया च्याप्टरले आइतबार  आदिकवि भानुभक्त आचार्यको स्मरण गर्दै बृहत् मुक्तक मेला सम्पन्न गरेको छ ।

आदिकविको २०४ औं जन्मजयन्तीको अवसर पारेर च्याप्टरले बृहत मुक्तक मेला तथा विविध रचना वाचन गरेको हो |

तोङ्देमुनस्थित शुभेच्छा रेस्टुरेन्टकोमा सप्पन्न मुक्तक मेलामा कोरियामा कार्यरत रही मुक्तकमा कलम चलाइरहेका प्रमुख ८  मुक्तककारहरूले  प्रस्तुति रहेको थियो ।

प्रमोद सारङ्ग, नारायण भुसाल, गङ्गा बस्नेत, दिपेन्द्र भट्टराई, समीर यात्री, महेन्द्र केसी, रेशम अधिकारी र पूर्वेली गाउँले लगायतका  मुक्तककारहरूले देश, राजनीति, प्रवास र प्रणय मिश्रित बिषयलाई मुक्तकमा समावेश गरेका थिए |

भानुको स्मरण गर्दै कवि विनोद परिवर्तितले रामायणको बालकाण्ड अन्तर्गतका उत्कृष्ट श्लोकहरू सुनाइरहँदा दर्शकदीर्घामा मौनता छाइरह्यो । त्यस लगत्तै स्रस्टाहरू यल्जी विवश, मोहन कार्की, सरोज सर्वहारा, भोजराज जैशी, जनक सन्याल, गोपिकृष्ण लामिछाने, माधव पाण्डे, रामचन्द्र शर्मा, शंकर वि क सङ्गम, डि.कर्ण मल्ल लगायतले गजल र कविता वाचन गर्दा माहौल थप रोमाञ्चक बन्यो ।

उक्त अवसरमा कोरियामा रही विभिन्न संचारमाध्यममा आवद्ध पत्रकारहरू सन्दिप पाण्डे, कृष्ण बस्याल र विकाश श्रेष्ठलाई सम्मान गरिएको थियो भने च्याप्टरका नयाँ सदस्यलाई प्रमाणपत्र प्रदान गरिएको थियो ।

च्याप्टरले यसअघि उत्कृष्ट कवि तथा चर्चित गजलकारहरूको साथमा कविता वाचन तथा गजल मुशायरा सन्चालन गरिसकेको छ भने हालै मात्र विश्व नेपाली काव्य गोष्ठी तथा अनेसासको एसिया सम्मेलन सम्पन्न गरेको छ ।