आइफोनले थिचेको मन

उसको जन्मदिनमा
पठाएको थिंए मैलेपनि
एक अन्जुली शुभकामना
भलै थोरै किन नहोस्
तर मायाले भरिएको थियो
शुभकामनाहरुको भीडमा
शायद खै उनले नदेखेर हो कि?

कुनै प्रतिक्रिया पनि आएन
केहि दिन पछाडिको कुरा
संयोगले गल्लीमा उनलाई भेटें
प्रश्न गर्न मन लाग्यो अनि सोधें
तिम्रो जन्मदिन त भव्य भ’एछ हगि?

अं सोचेभन्दा दामी भो
उनको जवाफ थियो
हातको नया आईफोन देखाउदै भनिन्
यो युएसबाट फलानोले पठाको
घांटीको नेकलेस् देखाऊदै भनिन्
यो कोरियाबाट फलानोले पठाको
भिरीरहेको हाते ब्याग देखाउदै भनिन्
फ्रान्सबाट फलानोले पठाको
खै अरु पनि के के धेरै देखाउदै थिई
म मा हेर्न र सुन्न सक्ने सामर्थ्य थिएन
मात्र यति भनेर हिडें |

रुप बजारको भीडमा तिमीले
राम्रो मुल्य पाएछौ,धेरै खुशी लाग्यो
तर बहुमुल्य उपहारको पासोमा नफस्नु ल
फेरि पनि जन्मदिनको धेरै धेरै शुभकामना
शायद त्यसैदिन देखी हुनपर्छ
मलाई जन्मदिनको शुभकामना दिन मन पर्दैन
जब नोटिफिकेसनमा कसैको जन्मदिन देख्छु
मैले दिन नसकेको आईफोन
मैले दिन नसकेको उपहार
अनि नेक्लेस र ह्याण्डब्याग भारी भएर आउदछ
अनि म नराम्ररी थिचिन्छु।

जनवरी २०,२०१७