दक्षिण कोरियामा अनलाइन खाद्य बजार आक्रामक रुपमा माथि उठ्दै

सोल – कोरोना भाइरससँगै दक्षिण कोरियाली खाद्य ब्यापारमा नयाँ आयामको सुरुवात भएको छ । कोरोना संक्रमण सुरु हुनु अघि सामान्य मात्र रहेको अनलाइन खाद्य ब्यापार कोरोना संक्रमणको अवधिमा भने आक्रामक रुपमा अघि बढेको तथ्याङ्कले देखाएको छ ।

श्रोतका अनुसार एसियाको चौथो ठूलो अर्थतन्त्र भएको दक्षिण कोरियामा सन् २०२० मा करिव ४३.४ ट्रिलियन वन अर्थात ३९.२ विलियन अमेरिकी डलर बराबरको खाद्य सामाग्री अनलाइन मार्फत विक्रि भएको छ । उक्त रकम अघिल्लो बर्षको भन्दा करिव ६२.४ प्रतिशत भन्दा बढी रहेको श्रोतले बताएको छ ।

सन् २०१९ मा २६.७ ट्रिलियन वनमा सिमित रहेको अनलाइन खाद्य बजार सन् २०२० मा आइपुग्दा ४० ट्रिलियन वन भन्दा माथि पुगेको हो । गत बर्ष अनलाइन बजार यसरी बढ्नुमा कोरोना संक्रमणका कारण मानिसहरुमा बजार गएर मानिसहरुसँग सम्पर्क कम गर्न दिइएको सरकारी निर्देशनको असर समेत रहेको समाचारमा बताइएको छ ।

अनलाइन मार्फत सबैभन्दा बढी खाद्यान्न, ग्रोसरी तथा माछामासु खरिद गरिएको थियो । मोबाइल मार्फत अनलाइन कारोबार गर्नेहरुको संख्या सर्वाधिक रहेको समाचारमा बताइएको छ । कुल अनलाइन कारोबारको ७० प्रतिशत हिस्सा मोबाइल खरिदको रहेको समेत समाचारमा बताइएको छ ।