दक्षिण कोरियामा फेब्रुअरी २४ बाट आष्ट्राजेनेकाको खोप सुरु गरिने

सोल – दक्षिण कोरियामा कोरोना विरुद्धको खोप अभियान फेब्रुअरी २४ बाट सुरु गरिने भएको छ । खोप उत्पादक कम्पनी आष्ट्राजेनेकाबाट खोप आए लगत्तै उक्त खोप नागरिकमा लगाउन सुरु गरिने स्वास्थ्य अधिकारीहरुले बताएका छन् ।

प्रधानमन्त्री चुङ साई क्युनले राष्ट्रिय सभालाई सम्बोधन गर्दै उत्तर जानकारी दिएको दक्षिण कोरियाली सञ्चार माध्यमहरुले बताएका छन् । ज्येष्ठ नागरिकहरुका हकमा भने हालै उक्त कार्यक्रम सञ्चालन नगरिने उनले बताएका छन् ।

हाल दक्षिण कोरियामा आष्ट्राजेनेकाका अलावा रसियन खोप स्पुतनिक भी ल्याउने बारेमा समेत छलफल भइरहेको उनले जानकारी दिएका छन् । विश्व स्वास्थ्य संगठन अन्तरगतको कोभ्याक्स मार्फत आउने फाइजर खोप भने आउन केही समय लाग्ने उनले जानकारी दिएका छन् ।

यता कोरियाली रोग तथा प्रकोप नियन्त्रण केन्द्र केसिडिसी प्रमुख ज्योङ इयुन क्युङले पछिल्ला दिनहरुमा कोरोना भाइरसको नयाँ प्रकारको संक्रमण बढेसँगै युरोपेली मुलुकहरुमा समेत रसियन खोपको प्रयोग बढेको बताएका छन् । ५० प्रतिशत मात्र प्रभावकारी मानिएको सिनोभ्याक्सको समेत माग बढीरहेको उनले जानकारी दिएका छन् ।