दक्षिण कोरियामा फाइभ जी प्रयोगकर्ताको संख्या करोड नाघ्यो

सोल – दक्षिण कोरियामा फाइभ जी नेटवर्क प्रयोग गर्ने मानिसहरुको संख्या १ करोड १८ लाख ५० हजार बढी पुगेको सरकारी तथ्याङ्कले देखाएको छ । फाइभ जी प्रयोगकर्ताको संख्या ह्वात्तै बढेसँगै नेटवर्क ट्राफिक समेत बढेको सरकारी श्रोतले बताएको छ ।

दक्षिण कोरियाली वसज्ञान तथा आइसिटी मन्त्रालयका अनुसार चालु महिनामा मात्र फाइभ जी सुविधा प्रयोग गर्नेहरुको संख्या अघिल्लो महिनाको भन्दा ८ प्रतिशतले बढेको छ । पछिल्ला दुई महिनामा मात्र ९ लाख बढी फाइभ जी प्रयोगकर्ता बढेको मन्त्रालयले बताएको छ ।

पछिल्लो समयमा आइफोनले लञ्च गरेको आइफोन १२ तथा देशकै स्थानीय फोन उत्पादकहरु बीचको प्रतिस्पर्धाका कारण सस्तो मुल्यमा उपलब्ध साधनहरुका कारण फाइभ जी प्रयोगकर्ताहरु ह्वात्तै बढेको सरकारी अनुमान छ । ग्यालेक्सी एस २१ श्रेणीको बिक्री सुरु भएसँगै प्रयोगकर्ताहरुको संख्या अझै बढ्ने आँकलन गरिएको छ ।

प्रयोगकर्ताहरुको संख्या ह्वात्तै बढेता पनि सरकारको आँकलन भन्दा कमै रहेको अधिकारीहरुले बताएका छन् । यो समयसम्म आइपुग्दा उक्त सुविधा प्रयोग गर्नेहरुको संख्या १ करोड ५० लाख पुग्ने आँकलन गरिएको थियो । यता यस बर्षको मध्यसम्म आइपुग्दा फाइभ जीले फोर जी डाटा ट्राफिकलाई उछिन्ने बताएका छन् ।