उत्तर कोरियामा कोरोना विरुद्धको सतर्कता कडाईका साथ अपनाउन निर्देशन

सोल – उत्तर कोरिया सरकारले विश्वभर कोरोना संक्रमितहरुको संख्या १०० मिलियन पार गरेसँगै सुरक्षा सतर्कतालाई उच्च राख्न निर्देशन दिएको छ । वर्कर्स पार्टीको आधिकारिक पत्रिका रोडोङ सिनमुन मार्फत उक्त निर्देशन दिइएको हो ।

समाचारमा भनिएको छ – विश्वभर संक्रमितको संख्या १०० मिलियन बढी भएको छ भने मृत्यु समेत २१ लाख बढीको भइसकेको छ । यो परिस्थितिमा उत्तर कोरियाले हाल सम्मकै कडा सुरक्षा अपनाउन जरुरी छ र उक्त सुरक्षा अपनाउन निर्देशन समेत दिइएको छ ।

समाचारमा कोरोनालाई दुस्मन बताउदै हरेक उत्तर कोरियालीलाई त्यस विरुद्ध आक्रामणका लागि तयार सेनाको रुपमा चित्रित गरिएको छ । हरेक उत्तर रणभुमिको सिपाही जस्तै बनेर कोरोना भाइरससँग लड्न उक्त समाचारबाट निर्देशन दिइएको छ ।

हालसम्म संक्रमितहरु नपाइएको भनिएको उत्तर कोरियाले कडा प्रतिवन्धहरु लगाएको छ । सीमा क्षेत्रहरु पुर्ण रुपमा बन्द गरिएका छन् भने राजधानी प्योङयाङ लगायतका शहरी क्षेत्रमा उच्च स्वास्थ्य सुरक्षा अपनाइएको छ । पछिल्ला दिनहरुमा सरकारी कार्यालयहरु समेत बन्द गरिएको छ ।