उत्तर कोरियाले कोरोना भ्याक्सिनका लागि माग्यो आइएनजीओको सहयोग

सोल –  उत्तर कोरियाले आफ्नो देशमा कोरोना खोप भित्राउन आइएनजीओको सहयोग मागेको छ । वालस्टिट जर्नलमा प्रकाशित समाचार अनुसार उत्तरले गाभी नामक संस्थासँग खोप आपुर्तिका लागि सहयोग मागेको हो ।

गाभीले खोप निर्माताहरुसँग सहकार्य गर्दै गरिव तथा अल्प विकसित मुलुकहरुमा खोप व्यवस्थापन गर्ने गर्दछ । विश्व स्वास्थ्य संगठनको प्रत्यक्ष निगारानीमा संस्थाले खोपमा सबैको समान पहुँच ब्यवस्थापन गर्ने गर्दछ । संस्थाले न्युन आय भएका विश्वका ९२ देशमा निःशुल्क खोप व्यवस्थापन गरिरहेको छ ।

उत्तर कोरिया न्युन आय भएका ८६ देशहरु मध्ये पर्दछ । उसले गत महिना मात्र भ्याक्सिनका लागि आवेदन दिएको थियो । उक्त निवेदन स्विकृत भएमा उत्तर कोरिया खोप तथा भण्डारणका लागि आवश्यक सामाग्रीका लागि योग्य हुने छ ।

पछिल्ला दिनहरुमा उत्तर कोरियाले खोप व्यवस्थापनका लागि युरोपका विभिन्न देशका राजदुतावासहरुमा समेत चहलपहल बढाएको समाचारमा बताइएको छ ।

हालसम्म ११७०७ जनाको परिक्षण गरेको उत्तर कोरियाले कसैमा पनि भाइरस देखा नपरेको दावी गर्दै आएको छ । ४२२५ जनामा हल्का ज्वरो देखा परेता पनि उक्त लक्षणका कसैमा पनि कोरोना भाइरस नभएको उत्तर कोरियाको दावी रहेको छ ।