दक्षिण कोरिया पुग्यो बेलायती कोरोना भाइरस

सोल – बेलायतबाट फर्किएका तीन जनामा नयाँ प्रजातिको कोरोना भाइरस भेटिएसँगै दक्षिण कोरियामा उक्त भाइरसको प्रवेश भएको छ । कोरोना भाइरसको हाल भेटिएको प्रकार पहिलेको भन्दा बढी संक्रामक रहेको बताइएको छ ।

दक्षिण कोरियाली रोग तथा प्रकोप नियन्त्रण केन्द्रका अनुसार बेलायतबाट आएका एकै परिवारका ३ जनामा उक्त भाइरसको नयाँ प्रकार फेला परेको हो । उनीहरु गत २२ डिसेम्बरमा बेलायतबाट दक्षिण कोरिया आएका थिए ।

इञ्चोन अन्तराष्ट्रिय बिमानस्थलमा गरिएको परिक्षणका क्रममा उनीहरुमा भाइरस पोजेटिभ देखिए लगत्तै उनीहरुलाई क्वारेन्टिनमा पठाइएका कारण अन्यहरुलाई भने उक्त भाइरस सरेको हुन नसक्ने स्वास्थ्य अधिकारीहरुले बताएका छन् ।

बिदेशबाट दक्षिण कोरिया अवतरण गर्नेहरु मध्ये दैनिक २०-३० जनामा कोरोना पोजेटिभ पाइने गरेको केन्द्रले बताएको छ । नयाँ प्रजातिको कोरोना भाइरसको चर्चा तथा ती ३ जनामा उक्त भाइरस भेटिएसँगै दक्षिण कोरियाली सरकारले बेलायतबाट हुने सबै उडानलाई अस्थायी रुपमा बन्द समेत गरेको छ ।