आप्रबासी कामदारहरुको आवास प्रबन्ध सुधार गर्न नागरिक समाजको माग

सोल – दक्षिण कोरियाको ख्योङ्गी प्रान्तमा रहेको पोच्योन स्थित एक फर्ममा काम गर्दै आएकी एक कम्बोडियन महिलाको कम्पनिकै आवास भित्र निधन भएको प्रति नागरिक समाजले चासो ब्यक्त गरेको छ । समाजले आप्रबासी कामदारहरुको आवासको यथोचित ब्यवस्थापन गर्न माग समेत गरेको छ ।

ति महिलाको निधन कलेज‍ो सम्बन्धि रोगका कारण भएको पाइएता पनि उनी बस्ने गरेको स्थान समेत दयनीय रहेको पाइएको थियो । उनी कृषि फर्मको एक हरित गृह घर (प्लास्टिकको टनेल) भित्र बस्दै आएकी थिइन् ।

समाजले हाल दक्षिण कोरियामा आउने आप्रबासी कामदारहरुको आवास ब्यवस्था दु:खद भएको बताएको छ । उनीहरु हरित गृह घर, स्याण्डवीच टनेल, तथा कन्टेनर भित्र बस्ने गरेको समाजका अगुअवाहरुले बताएका छन् । उनीहरुले उक्त आवास ब्यवस्थाले न गर्मी छेल्ने न जाडो नै छेल्ने भएका कारण कामदारको बसाई दयनीय रहेको बताएका छन् ।

आप्रबासी कामदार नियम २०१९ ले त्यस्ता आवास गृहहरु प्रयोग गर्न नपाइने बताएता पनि हाल सम्म पनि कम्पनिहरुले तिनैमा कामदारहरुलाई बसाइरहेका छन् । देशका करिव ५००० बढी कम्पनीहरुले आप्रबासी कामदार ल्याउने गरेता पनि २० प्रतिशतले पनि मापदण्ड अनुरुपको आवास प्रबन्ध नमिलाएको नागरिक समाजले बताएको छ ।

उनीहरुले सरकारी मापदण्ड पुरा नगर्ने कम्पनिहरुलाई आप्रबासी कामदार ल्याउन नदिन समेत सरकारलाई अनुरोध गरेका छन् । न्युनतम मानवीय मुल्य र मान्यतालाई सम्मान गर्न उनीहरुले कम्पनीलाई अनुरोध समेत गरेका छन् ।