दक्षिण कोरियाको लाल्टिन पर्व युनेस्को सम्पदा सुचीमा समावेश

सोल – दक्षिण कोरियामा प्रसिद्ध लाल्टिन पर्वलाई हालै युनेस्कोले विश्व सम्पदा सुचीमा सुचीकृत गरेको छ । भगवान गौतम बुद्धको जन्म जयन्तीका रुपमा मनाइने उक्त पर्वलाई साँस्कृतिक सम्पदाको रुपमा बुधबार फ्रान्सको राजधानी पेरिसमा बसेको युनेस्को समितिको बैठकले सुचीकृत गराएको हो ।

युनेस्कोको साँस्कृतिक सम्पदा विभागका अनुसार उक्त पर्वले ऐतिहासिक धार्मिक महत्व बोक्नुका साथै समुदायलाई प्रतिनिधित्व गराउन समेत सफल भएका कारण सुचीकृत गरिएको हो ।

यससँगै अब दक्षिण कोरियामा २१ वटा चाडपर्वहरु युनेस्कोको साँस्कृतिक सम्पदा भित्र समाबेश भएका छन् । जङ्म्यो धार्मिक संगित, पानसोरी संगित, अरिराङ लोकधुन, किम्ची संस्कृति लगागयतका कोरियाली संस्कृतिहरु युनेस्कोको उक्त सुचीमा सुचीकृत भएका छन् ।

बुद्धको शान्ति तथा ज्ञानको ज्योतिका रुपमा लिइने यस पर्वका समयमा मानिसहरुले गल्ली गल्लीमा लाल्टिन बालेर सबैको सुखमय जीवनको कामना गर्दछन् । यो पर्वलाई दक्षिण कोरियाको सिजनल पर्वको सुरुवातका रुपमा समेत लिइन्छ । यस पर्वलाई दक्षिण कोरियामा योनड्योङ्ह्वे नामले समेत चिनिन्छ ।